बागलुङ/ गलकोटका किसानलाई असार नलाग्दै रोपाइँको चटारो छ । सिञ्चित र दुई बाली फल्ने खेतमा रोपाइँ छिटो हुन्छ । जिल्लाकै धेरै धानखेती हुने गलकोटमा मध्य जेठबाटै रोपाइँ सुरु भएको कृषि ज्ञान केन्द्रले जनाएको छ ।

गलकोटको दुदिलाभाटी, नरेठाँटी र हरिचौरमा रोपाई सुरु भएको गलकोट नगरपालिका–२ का अध्यक्ष हिमबहादुर भण्डारीले बताए । ‘खोलाको पानी चिसो हुने ठाउँमा जेठको पहिलो सातादेखि रोपाई सुरु भयो, केही फाँटमा भने जेठको अन्तिम सातादेखि रोपाईं हुन्छ’ भण्डारीले भने ‘गलकोटमा औषत रोपाईं जेठमै हुन्छ ।’

कृषि ज्ञान केन्द्र बागलुङका प्रमुख भानुभक्त भट्टराईले बाह्रैमास सिँचाइ सुविधा पुगेका र खोला आसपासका खेतमा रोपाइँ छिटो हुने गरेको बताए । तर, गलकोटमा भैरहेको रोपाईं धेरै छिटो र बिउ कलिलो भएकाले उत्पादनमा क्षती हुने उनको धारणा छ ।

‘यो बर्ष वर्षा पनि भइरहेकाले रोपाइँलाई सबैतिर सहज हुनेगरी बिउ तयार भएको छ’, उनले भने, ‘असार सम्ममा अधिकांश ठाउँमा रोपाइँ सकिसक्छ ।’ त्यसक्षेत्र भएर बग्ने दरमखोला र गौँदी खोलाको पानीले त्यहाँको ठूलो उब्जाउ भूमिलाई सिञ्चित गर्ने भएकाले रोपाइँ छिटो हुने गरेको हो ।

नेपालमा सामान्यतया अंग्रेजी महिना जुन १० मा मनसुन भित्रिने गरेपनि कहिलेकाहीँ भने अलि छिट्टै मनसुन सक्रिय हुने गर्छ । केन्द्रका अनुसार, गलकोटसहित कुश्मीसेरा, खरबाङ, निसी, बुर्तिबाङ लगायतका क्षेत्र छिटो रोपाइँ हुनेमा पर्छन् । रोपाइँ हुने मुख्य महिना असार भए पनि ती ठाउँमा पहिल्यै रोपाइँ सुरु भइसक्छ । मकैबाली हुने खेतमा भने किसानले मकै झिकेपछि असार अन्तिम र साउनसम्मै रोपाइँ गर्छन् ।
बागलुङको दक्षिण अमलाचौर, नारायणस्थान, बिहुँ, पाला, मालिका, बुर्तिबाङको उपल्लो भेग लगायतका ठाउँमा भने रोपाइँ ढिलो हुन्छ । असार लागेपछि रोपाइँ भएको क्षेत्रको विश्लेषण गरेर नियमित तथ्याङ्क निकाल्ने गरिएको छ ।

जिल्लाको कूल छ हजार हेक्टर क्षेत्रफलमा धान खेती हुँदै आएको छ । त्यसमध्ये १० हेक्टरमा मात्र चैते धान लगाइन्छ । ‘यसवर्ष धानखेती हुने क्षेत्रफल बढ्ने अनुमान छ’, प्रमुख भट्टराईले भने, ‘उन्नतमा कम र स्थानीय जातकै धानमा किसानको बढी आकर्षण देखिन्छ, जिल्लाभर धानखेती हुने जमिनको तथ्यांकमा पनि घटबढ भैरहेको पाईन्छ, यसलाई हामी अध्यावधिक गर्ने चरणमा छौं ।’