बागलुङ/विश्व वातावरण दिवसको अवसरमा यहाँको एक विद्यालयले सडक तथा सार्वजनिक स्थलको सरसफाई गरेको छ । अमर आदर्श माध्यामिक विद्यालयको माध्यमिक तहमा अध्ययनरत विद्यार्थीहरुको सहभागितामा सडक र सार्वजनिक स्थल सरसफाई गरेको हो ।
बागलुङ बजारको ट्राफिकचोक, माझकोटचोक तथा बागलुङ बजार–भकुण्डे जोड्ने पुल आसपासका क्षेत्रमा सरसफाई गरिएको सहायक प्राचार्य कमल पन्तले बताए । ‘प्लाष्टिकजन्य प्रदुषणबिरुद्ध लागौं’ भन्ने नाराका साथ मनाईएको दिवसमा विद्यार्थीलाई सरसफाई र प्रदुषणको बिषयमा जानकारी गराईएको पन्तले बताए ।
सरसफाई कार्यक्रममा विद्यार्थीले उत्साहपूर्ण सहभागिता जनाएका थिए । बागलुङमा अन्य सरकारी तथा सामाजिक संघ संस्थाले विश्व वातावरण दिवस मनाएका छन् ।
