बागलुङ / कालीगण्डकी आवासीय माबिले विद्यार्थीलाई दुनाटपरी बनाउने तालिम दिएको छ । युवा रेडक्रस सर्कलको नेतृत्वमा बिद्यालयले प्रशिक्षकसमेत खोजेर तालिम दिएको प्रधानाध्यापक निरन्जनलाल राजभण्डारीले बताए ।
नेपाली समाजमा परम्परागत सीपको रुपमा दुनाटपरी बनाइन्छ । युवा पुस्ताले यो सीप बिर्सेकोले तालिममार्फत् सीप सिकाइएको राजभण्डारीले जानकारी दिए ।
नेपाल रेडक्रस सोसाइटी युवा सर्कल परिचालन संयोजक जीवन शर्माले तालिमका लागि पहल गरेको बताए । पहिलो चरणमा बिद्यालयका १ सय ५० जना विद्यार्थीलाई दुनाटपरी बुन्ने तालिम दिएको हो । सक्ने अवस्था भएका सबै बालबालिकालाई यो सीप सिकाइने उक्त विद्यालयका शिक्षकसमेत रहेका शर्माको भनाइ छ ।
आइतबार एक कार्यक्रमका बीच तालिम सुरु गरिएको हो । तालिम निरन्तर संचालन हुने बताइएको छ । समूह समूह बनाएर दैनिक वा समय समयमा तालिम संचालन गरिने भएको हो । बिद्यालयमा सामाजिक शिक्षामा रहेका विभिन्न परम्परागत सीप ज्ञान भन्ने शीर्षकलाई तालिमकै रुपमा संचालन गर्न लागिएको शर्माको भनाई छ ।
बिद्यालयले खाजाका लागि दुनाटपरी प्रयोग गर्ने र प्लाष्टिकजन्य प्लेट विस्थापित गर्ने योजना राखेको छ । प्रयोग भएका दुनाटपरी कुहिएपछि मल समेत बनाइनेछ । यो अभियानमा धौलागिरि बहुमुखी क्याम्पसकी प्राध्यापक प्रमिला राजभण्डारीले प्रशिक्षकको रुपमा साथ दिएकी छिन् ।
प्लाष्टिकजन्य बस्तुको उपयोगले वातावरणीय प्रदूषण बढेकोले सालको पातको दुनाटपरी बनाउँदा सीपको विकास र प्रदूषण घटाउन सकिने उनले बताइन् । नेपालीको जन्मदेखि मृत्यु संस्कारसम्म सालको पातको उपयोग गरिने भएकोले सबैले सीप जान्दा राम्रो हुने बताइन् ।
तालिम कार्यक्रममा नेपाल रेडक्रस सोसाइटीका सभापति जगन्नाथ आचार्यले विद्यार्थीलाई शुभकामना दिएका थिए । युवा रेडक्रस सर्कलका अध्यक्ष संगम क्षेत्रीको अध्यक्षता र सचिव सुजन शाक्यको संचालनमा तालिम आयोजना गरिएको हो ।
