पोखरा / जिल्ला समन्वय समिति कास्कीले आफ्नो दायित्व बुझाउन उपभोक्ता समितिहरुलाई प्रशिक्षण दिएको छ । प्रशिक्षणमा विकास निर्माणका कामलाई व्यवस्थित र गुणस्तरीय बनाउने तथा गुणस्तरीय विकास निर्माणमा उपभोक्ता समितिको भूमिकाबारे जानकारी गराइएको थियो । एकदिने प्रशिक्षणको सुरुमा जिसस कास्कीका प्रमुख लीलाधर पौडेलले उपभोक्ता समितिहरु सरकारका सहयात्री र सारथी भएको बताए ।
कतिपय विकास आयोजना निर्माण कम्पनी र कहिलेकाहिँ उपभोक्ता समितिका लापरबाहीका कारण अलपत्र परेको दृष्टान्त दिँदै उनले राज्यको लगानीमा लापरबाही गर्ने छुट कसैलाई पनि नभएको जानकारी गराए । कानूनबाट कसैले उन्मुक्ति नपाउने उनको भनाइ थियो ।
प्रशिक्षणमा पूर्वसीडीइ भुपेन्द्र गौचन, कोष तथा लेखा नियन्त्रण कार्यालयका केशवराज ढकाल ,जिल्ला समन्वय समिति कास्कीका शाखा अधिकृत झबिश्वर रेग्मीले सहजीकरण गरेका थिए ।
