पोखरा/ गण्डकी प्रदेश सभामा एमाले सांसद श्यामराजा महतको बोल्ने शैली अन्य सांसदको भन्दा फरक हुन्छ । शुन्य समयमा बाहेक अन्य विषयमा बोल्दा उनले एकदुईवटा गीतका टुक्का सुनाइ हाल्छन् । यसले प्रदेश सभामा एकप्रकारको रौनक नै देखिन्छ ।
सोमबार भौतिक मन्त्रालयको बजेटसम्बन्धि छलफलमा भाग लिने क्रममा पनि उनले ३ वटा गीतका टुक्का सुनाए । बजेटप्रति असन्तुष्टिको संकेतका रुपमा उनले गीत गाएका थिए । एउटा गीत यस्तो थियो, ‘मेरो मायालुलाई कति पर्यो पिर पनि, ठाडो छैन शिर पनि ।’
सरकारले ल्याएको बजेट निर्वाचन क्षेत्रको आवस्यकतालाई भन्दा पहुँच र दवावमा आएको उनको भाव थियाे । आफ्नो निर्वाचन क्षेत्रमा जाँदा नामर्द भनेको र त्यसलाई चिर्न मेरो जति बजेट अरुकोमा परेको छैन भन्दै हिड्नु परेको गुनासो गरे । । आफ्नो निर्वाचन क्षेत्रमा ४/ ५ करोड बजेट परेको उनको भनाई थियो ।
उनले सांसद विकास कोष खारेज गरे पनि प्रदेश सरकारले घुमाउरो तरीकाले सांसदको सिफारिशमा ५०/५० लाखका योजना बजेटमा राखिएको खुलासा गरे । ‘बजेटले सांसद विकास कोष नभने पनि सांसदले मागेको योजनामा बजेट विनियोजन भएको छ’, उनले भने, ‘पत्रकारले लेख्न र मुद्धा हाल्ने बाटोमात्र रोकिएको छ ।’
उनले अरु गीतका टुक्का पनि सुनाए– त्यसै मेरो उडेको मन झन मायाले घरबारे नभन ।
हृदयको घाउ सन्चो भाछैन, बोलाउँदा पनि बोल्न मन लाछैन
बजेट बनाउने बेला अर्थमन्त्रीलाई भेट्न जादा फकाईएको प्रसंग उल्लेख गर्दै महतले के गोप्य हाेला भन्ने लागेको सुनाए । ‘आखिर नशा पानी भित्र गोप्य रुपमा खाए पनि बाहिर देखिन्छ’, उनले भने, ‘जति गोप्य भए पनि बजेटको अवस्था कितावमा छरपस्ट भएको देखियो । भनिरहन जरुरी भएन् ।’ कुनै बेला कसैलाई गाली गर्नुपर्यो भने तलाई मन्त्री हुन परोस् भनिन्थ्यो त्यस्तो अवस्था नआओस् भन्ने उनले कामना गरे ।
