पोखरा / जेनजी आन्दोलनको क्रममा कास्की कारागारबाट फरार एक जना कैदीले भुन्डिएर आत्महत्या गरेका छन् । ज्यानसम्बन्धी कसुरमा दोषी ठहर भई कास्की कारागारमा रहेका ५५ वर्षीय देवबहादुर विश्वकर्मा सोमबार बिहान पोखरा महानगरपालिका–२६ बरालडाँडास्थित घरमा मृत भेटिएका हुन् ।
प्लास्टिकको डोरीले पासो लगाएको अवस्थामा उनी मृत भेटिएको जिल्ला प्रहरी कार्यालय कास्कीका सूचना अधिकारी डीएसपी हरिबहादुर बस्नेतले बताए । उनी करिब ४ वर्षअघि कोरोना भाइरस संक्रमणको समयमा हत्या अभियोगमा पक्राउ परेका थिए । उनले सहजीवन (विवाह नगरे पनि सँगै जीवन बिताउने) सम्बन्धमा रहेकी महिलाको हत्या गरेका थिए ।
जुन घरमा सोमबार बिहान देवबहादुर मृत भेटिए, त्यही घरमा उनले करिब ४ वर्षअघि ती महिलाको हत्या गरेको छिमेकी रमेश बरालले सुनाए । ‘आफू अहिले जुन घरमा झुन्डिए, त्यही घरमा हत्या गरेका हुन्,’ उनले सुनाए, ‘देवबहादुर आएका छन् भन्ने सुनेको थिएँ, भेट भएको थिएन । प्रहरीले खोजेको थाहा पाएर कहिले वनतिर, कहिले कता लुक्ने गर्थे ।’
उनले जुन घरमा आत्महत्या गरे, त्यसको छेउमै उनका वृद्ध बुबा र तीन जना दाजुहरू पनि बस्छन् । उनीहरूले नै देवबहादुरले आत्महत्या गरेको देखेपछि गुहार मागेका थिए । ‘घटना कति बेला भयो भन्ने ठ्याक्कै थाहा छैन,’ उनले थपे, ‘दाजुभाइको घर जोडिएको छ, उनीहरूले नै देखेका हुन् ।’
हत्या अभियोगमा कारागार पुग्नुअघि उनी गाउँमै खेती मजदुरी गर्थे । उनका श्रीमती र चार छोरा छन् । श्रीमती र कान्छो छोरा बजारतिर छुट्टै बस्थे । देवबहादुरले आत्महत्या गरेको थाहा पाएपछि उनीहरू सोमबार बिहान घर गएका थिए । उनको शव पोस्टमार्टमका लागि पश्चिमाञ्चल क्षेत्रीय अस्पतालमा राखिएको छ ।
