पोखरा/ स्याङ्जाको गल्याङ नगरपालिका–१, मालुङ्गा र पाल्पाको रम्भा गाउँपालिका–१ को सङ्गमस्थल उत्तरवाहिनी क्षेत्र (कालीगण्डकी तट) मा सञ्चालित उत्तर गण्डकी महामेला दामोदर धर्मोत्सव–२०८२ मा पोखराबाट यही कात्तिक १४ गते बृहत् कार र्याली गरिने भएको छ ।
कालीगण्डकीको महिमालाई विश्वभर प्रचारप्रसार गरी धार्मिक पर्यटन प्रवद्र्र्धन गर्ने उद्देश्यसाथ कालीगण्डकी ज्ञानविज्ञान प्रतिष्ठानको आयोजनामा यही असोज २१ देखि कात्तिक १९ गतेसम्म धार्मिक महोत्सव सञ्चालन भैरहेको छ । महामेलालाई सफल बनाउने उद्देश्यका साथ पोखराबाट बृहत् कार र्याली गर्न लागिएको प्रचारप्रसार उप समिति कास्कीका संयोजक चन्द्रकान्त बरालले जानकारी दिए । कात्तिक १४ गते बिहान ७ बजे पोखरा १७ स्थित बराल फिडदेखि सुरु हुने कार र्याली मालुङ्गासम्म गरिने जानकारी उनले दिए ।
कालीगण्डकी ज्ञानविज्ञान प्रतिष्ठानका अध्यक्ष आचार्य श्री चैतन्यकृष्ण जी महाराजका अनुसार यस महामेलामा विश्वभरिकै गण्डकी एवम् शालग्राम भगवानका प्रेमीजन, विद्वान, सन्त तथा आचार्यहरूद्वारा दिव्य शास्त्र एवम् भक्तिको महिमाले परिपूर्ण कथा श्रवण गर्न पाइनेछ । महामेलामा करिब ५ अर्ब तुलसीपत्र एवम् पवित्र उत्तरबाहिनी गण्डकी जलद्वारा सवा लाख दिव्य शालग्राम शिलाहरूको अभिषेक एवम् पूजन गरिने उनले जानकारी दिए । महायज्ञमा भगवान दामोदर, माता गण्डकी, शालग्राम शिला एवम् तुलसी महारानीको नित्य दिव्य महाआरती भैरहेको र विश्वभरका प्रसिद्ध व्यक्तिहरू, धार्मक समाजसेवी, योगीहरू एवम् विशिष्ट वक्ताहरुद्वारा विशेष प्रवचन भैरहेको आयोजकले जनाएको छ । महामेलामा उत्तरबाहिनी गण्डकी महास्नान, तीर्थश्राद्ध एवम् उत्तरबाहिनी गण्डकी क्षेत्र परिक्रमा आदि कार्यक्रम पनि सम्पन्न हुने जनाइएको छ ।
