काठमाडौं / भक्तपुरको सूर्यविनायक नगरपालिका-९ भातेढिकुरमा सुन्दै विश्वास नलाग्ने घट्ना भएको छ । त्यहाँ आफ्नै छोराको कुटपिटबाट एक महिलाको मृत्यु भएको छ ।
उदयपुर कटारी नगरपालिका-५ घर भई हाल भक्तपुर सूर्यविनायक नगरपालिका-९ भातेढिकुर बस्दै आएकी ४० वर्षीया मेघिया चौधरीको आफ्नै छोराको कुटपिटबाट मृत्यु भएको हो ।
जिल्ला प्रहरी परिसर भक्तपुरका अनुसार शुक्रबार साँझ करिब ७.४५ बजे मेघियामाथि उनका छोरा २४ वर्षीय किरण चौधरीले कुटपिट गरेका थिए ।
छोराको कुटपिटबाट गम्भीर घाइते भएकी मेघियालाई उपचारका लागि ललितपुरको पाटन अस्पताल लगिएको थियो । उपचारकै क्रममा राति १ बजे उनको मृत्यु भएको प्रहरीले जनाएको छ ।
