बागलुङ, २१ चैत– कोरोना भाइरसबाट संक्रमण भएकी बागलुङकी एक महिलालाई अस्पतालमा भर्ना गरेर उपचार गराउने तयारी भएपछि बोलाइएको नेपाल रेडक्रस सोसाइटीको एम्बुलेन्सले बिरामी बोक्न नमानेको विषय यतिबेला चर्चामा छ ।
यो चर्चाले अन्य स्वास्थ्य क्षेत्रका सवारी र एम्बुलेन्सको अबस्था पनि त्यस्तै हुनेमा धेरैको चासो बढ्यो । आवस्यक तालिम र सुरक्षा सामाग्री नभएकोले उक्त घटना भएको हुन सक्ने उच्च सुरक्षा तहमा ठहर भएपछि सदरमुकाममा तालिम संचालन भएको छ ।
उपलब्ध एम्बुलेन्स चालकका लागि नेपाली सेनाको २३ नम्बर बाहिनीअन्र्तगतको फिए गुल्मले शुक्रबार ७ जना चालकलाई तालिम दिएको छ । सेनाले उच्च सर्तकताका लागि अपनाउनुपर्ने उपायबारे सिकाएको अञ्चल अस्पतालका अध्यक्ष केवी रानामगरले बताए । सर्तकताको अभावका कारण बिहिबारको घटना भएको उनले बताए । ‘रेडक्रसका अध्यक्ष पाको भएर पनि कच्चा काम गर्नुभएको रहेछ’ रानाले भने, ‘सुरक्षाको ग्यारेन्टी त दिनैपर्छ ।’ चालकले नियुक्ती नपाएको भन्दै काम नगरेको घटनामा भने रेडक्रसले कमजोरी स्विकार गरेको छ ।
कोरोना संक्रमणबाट बच्ने र संक्रमणको बेला सुरक्षित रहन लगाउनुपर्ने पिपिई लगायतबारे चालकलाई तालिम दिएको हो । संक्रमितको स्वाब संकलन गर्दा ओरिजिनल पिपिई चाहिन्छ भने चालक भएर सवारी साधनमा ल्याउनका लागि सामान्य खालको पिपिइ भएपनि हुने चिकित्सकले बताए । प्रत्यक्ष सम्पर्क नगर्नेका लागि चाहिने पिपिई विभिन्न दाताबाट अस्पतालमा पनि आएको छ ।