बागलुङ, २० जेठ– नेपाल मेडिकल कलेजका डाक्टरमाथि हातपात गर्नेलाई कारवाहीको माग गर्दै त्यहाँ कार्यरत चिकित्सकले गरेको आम हड्तालप्रति धौलागिरी अस्पतालका चिकित्सकले ऐक्यवद्वता जनाएका छन् ।
नेपाल मेडिकल कलेजका चिकित्सकमाथि हातपात गर्ने दोषीलाई कारवाहीको माग गर्दै धौलागिरी अस्पताल बागलुङमा कार्यरत स्वास्थ्यकर्मीहरुले प्ले कार्डंसहित मुखमा कालोपट्टी बाँधेर बिरोध जनाएका हुन् ।
घटना भएको ६ दिन बितिसक्दा पनि कारवाहीको लागि कुनै पहल नगरेको भन्दै अस्पतालका चिकित्सक र स्वास्थ्यकर्मीले पनि अस्पताल परिसरमै बिरोध प्रदर्शन गरेको अस्पतालका प्रमुख डा. शैलेन्द्र वि. पोखरेलले जानकारी दिए ।
कोरोना भाइरसको महामारीबीच आफ्नो ज्यानसमेत जोखिममा राखेर काम गरिरहेका स्वास्थ्यकर्मीमाथि पटकपटक अस्पतालभित्रै हुने हातपातका घटना बढेको र दोषीलाई कारवाही गर्नुको सट्टा धरौटीमा रिहाई गर्नु न्यायोचित नभएको भन्दै विरोधमा उत्रनु परेको डा. पोखरेलको भनाई छ ।
जेठ १४ गते जोरपाटीस्थित नेपाल मेडिकल कलेजमा उपचारका क्रममा बिरामीको मृत्यु भएको भन्दै आफन्तले उपचारमा संलग्न चिकित्सकमाथि हातपात गरेका थिए ।