पोखरा, २० भदौ – गण्डकी प्रदेशसभा सचिवालयले बल्ल सचिव पाएको छ । निमित्तको भरमा चलेको प्रदेशसभा सचिवालयमा शुक्रबार अधिवक्ता हरिराज पोखरेललाई सचिव नियुक्त गरिएको हो । गण्डकी प्रदेश प्रमुख अमिक सेरचनले गण्डकी प्रदेशका सभामुख नेत्रनाथ अधिकारीको सिफारिसमा पोखरेललाई शुक्रबार सचिव नियुक्त गरेको प्रदेश प्रम्खका संचार संयोजक रुद्र श्रीस मगरले जानकारी दिए । नेपालको संविधानको धारा १९५ को उपधारा १ अनुसार प्रदेश प्रमुखले सचिव नियुक्त गरेका हुन् । पोखरा निर्मलपोखरीको फोक्सिङ पोखरेलथोकका पोखरेल यसअघि पश्चिमाञ्चल स्वास्थ्य विज्ञान प्रतिष्ठानको कानूनी सल्लाहकार थिए । राजनीतिक रुपले सत्तारुढ पार्टी निकट रहेका पोखरेल कानून व्यवसायी पनि हुन् । हाल उनी पोखरा–१७, जागृतिटोल बस्दै आएका छन् ।