तस्वीर: अर्जुन ढकाल

पोखरा, २० भदौ – गण्डकी प्रदेशका मुख्यमन्त्री पृथ्वीसुब्बा गुरुङ शनिवार बागलुङको ढोरपाटन नगरपालिकाको भुजीखोलामा बुधबार राती आएको बाढीपहिरो घट्नास्थलमा पुगेका छन् । त्यहाँ पुगेको मुख्यमन्त्रीले बाढीपहिरोवाट ज्यान गुमाएका परिवारलाई प्रतिव्यक्ति ५० हजारका दरले तत्कालिन राहत उपलब्ध गराएका छन् । ज्यान गुमाएका परिवारलाई तत्कालिन राहत प्रतिब्यक्ति ५० हजार र बाढीपहिरोबाट ज्यान बचाएका र घर गुमाएर विस्थापित भएका परिवारका लागि टेन्ट, मेट्रेस, भाँडाकुँडा, प्राथमिक उपचारका सामग्री, लगायत राहत सामग्री प्रदान गरेका छन् । मुख्यमन्त्री गुरुङले राहत रकम र सामग्री नगरप्रमुख देवकुमार नेपालीलाई हस्तान्तरण गरे ।
सो अवसरमा मुख्यमन्त्रीले बाढी प्रभावितहरुको अस्थायी बसोबासका लागि तत्कालै अन्य सहयोग गर्ने र  स्थायी आवास निर्माणका लागि संघ सरकारले उपलब्ध गराउने प्रतिपरिवार ३ लाख रुपैयाँमा गण्डकी प्रदेशले थप गरेर सहयोग गर्ने प्रतिवद्धता जनाए । उनले बाढी प्रभावितहरुको लागि पक्की र भूकम्प प्रतिरोधी आवास बनाउने प्रदेश सरकारको नीति रहेको वताउदै त्यसका लागि कार्य थाल्न प्रदेश सरकार प्रतिवद्ध रहेको वताए ।
भुजीखोलाको किनारा आफैंमा जोखिमपूर्ण ठाउँ भएको र विपत्ति आइलागेको वताउदै मुख्यमन्त्रीले अब बाढीपहिरोबाट विस्थापितहरुलाई सुरक्षित स्थानमा एकीकृत बस्ती बनाएर राखिने वताए । यो कामका लागि प्रदेश सरकारले काम सुरु गर्न बिलम्व गर्ने छैन, उनको प्रतिवद्धता थियो । बाढीपहिरो गएकै दिन घटनास्थल पुग्ने आफ्नो चाहना मौसमी प्रतिकूलता बाधक बनेकोमा स्थानीयसंग क्षमा मागे । मुख्यमन्त्रीसंगै प्रदेशसभा सदस्य इन्द्रलाल सापकोटा, चन्द्रवहादुर वुढा लगाएको टोली पुगेको थियो ।