बागलुङ – चार महिनादेखि रिक्त रहेको धौलागिरी अस्पताल व्यवस्थापन समितिको अध्यक्षमा जैमिनी सर्कुवाका नारायण प्रसाद शर्मा पौडेल मनोनित भएका छन् । पौडेल जनता मावि सर्कुवाका पूर्व प्रधानाध्यापक हुन् ।
गण्डकी प्रदेश सरकारले जैमिनी नगरपालिका-४ सर्कुुवाका नारायण प्रसाद शर्मा पौडेललाई मनोनित गरेको हो । प्रदेशको स्वास्थ्य तथा जनसंख्या मन्त्रालयले अस्पताल व्यवस्थापन समिति गठन आदेश २०७८ को दफा १ बमोजिम पौडेललाई आगामी ३ बर्षका लागि अध्यक्षमा मनोनित गरेको हो ।
मन्त्रालयले अस्पताल व्यवस्थापन समितिको सदस्यमा बानपा-४ का धनमाया शर्मा, बानपा-१४ का लक्ष्मीदेवि जिसी, बानपा-३ का कृष्णशंकर श्रेष्ठ, बडिगाड-१ का रुनमाया थापा र बानपा-३ का गगन बहादुर पुनलाई मनोनित गरेको छ ।
समितिको सदस्यमा उद्योग वाणिजय संघ बागलुङ र बागलुङ नगरपालिका प्रतिनिधि पदेन सदस्य रहने र मेडिकल सुपरीटेण्डेण्ट सदस्य सचिव रहने व्यवस्था गरेको छ । पुस २१ गतेको मितिमा उनीहरुलाई मनोनय गरिएको भएपनि हालसम्म नयाँ समितिले पदभार ग्रहण गरेका छैन् । निवर्तमान अध्यक्ष केवी राना मगरको कार्यकाल सकिएपछि अस्पताल ब्यवस्थापन समिति गत असोजदेखि पदाधिकारीविहिन बनेको थियो ।
