पोखरा/ विन्दवासिनी दोहोरी साँझले दोहोरी गीत प्रतियोगिताको आयोजना गर्न लागेको छ । पोखरा चिप्लेढुंगामा रहेको उक्त साँझले असार २२ गतेदेखी २६ गतेसम्म दोहोरी साँझ स्तरीय दोहोरी प्रतियोगिताको आयोजना गर्न लागेको हो ।
दोहोरी साँझको संचालनको तयारीअनुरुप उक्त प्रतियोगिताको आयोजना गरेको संचालक विरेन्द्र केसीले जानकारी दिए । उनका अनुसार दोहोरी साँझहरुबीच अन्तरसम्बन्ध बनाउने र दोहोरी गीतको प्रचार गर्ने योजना रहेको छ ।
प्रतियोगितामा दोहोरी साँझमै गाउने कलाकालरले मात्र सहभागिता जनाउन पाउने कार्यक्रम संयोजक सुमन खड्काले जानकारी दिए । प्रतियोगिता हेर्न आउने दर्शकलाई कुनै शुल्क नरहेको उनले बताए ।
प्रतियोगितामा एक पुरुष र एक महिला गायक मात्र हुनुपर्नेछ । प्रतियोगिताको प्रथमले नगद ३० हजार, दोस्रोले २०, तेस्रोले १० र सान्त्वना हुने टिमले पाँच हजार रुपैयाँ प्राप्त गर्नेछन् ।
यस्तै प्रतियोगितामा सहभागी हुने कलाकारले नेपाली पोशाक अनिवार्य रुपमा लगाउनुपर्नेछ । पाँच दिनसम्म चल्ने प्रतियोगिता दिउँसो तीन बजेदेखी साँझ सात बजेसम्म संचालन हुनेछ ।
