बागलुङ/आगामी असोज २ देखि ४ गतेसम्म विभिन्न कार्यक्रम गरी संविधान दिवश मनाइने भएको छ । जिल्ला समन्वय समितिका प्रमुख अमरबहादुर थापाको अध्यक्षतामा आइतवार बसेको सरोकारवालाको बैठकले दिवसमा दर्जनबढी कार्यक्रम संचालन गर्ने निर्णय गरेको हो ।
क्रियाशिल राजनीतिक दल, संघसंस्था, बार, पत्रकार र सरकारी कार्यालयको सहभागितामा ती क्रियाकलापल संचालन हुनेछन् । बैठकले तीन दिनसम्म सबै कार्यालय, बजारका घरघर र सार्वजनिक स्थलमा समेत राष्ट्रिय झण्डा फहर्याउने, दिपावली गर्ने लगयतको निर्णय गरेको हो ।
संविधान दिवशबारे विद्यालय स्तरीय वक्तृत्वकला गर्ने, संविधानको अन्तरवस्तु र संशोधनको आवस्यकताबारे बहस तथा अन्तरक्रिया चलाउने, कारागारका कैदीबन्दीलाई खेल सामाग्री दिने, मानवसेवा आश्रममा खाद्यान्न सहयोग गर्ने निर्णय भएको हो । त्यसबाहेक मुल समारोहमा राजनीतिक दल, संघसंस्था, गैरसरकारी संस्था, विद्यार्थी, प्राध्यापक र शिक्षक लगायतको सहभागिता जनाउने निर्णय भएको जिल्ला समन्वय समितिका सूचना अधिकारी दुर्गाप्रसाद शर्माले बताए ।
बैठकमा सबैले आफ्ना सुझाव दिएका थिए । प्रधानमन्त्रीको अध्यक्षतामा बसेको तयारी समितिले गरेको निर्णयबमोजिम गृहमन्त्रालयले गरेको परिपत्रको आधारमा तोकिएका शिर्षकमा कार्यक्रम गर्न पनि सबै सहमत भएका छन् । सबै पालिका तहमा पनि संविधान दिवश मनाइने छ । तत्थांक संकलन गरेर जनआन्दोलनमा घाइते, मृतक वा अन्य पीडित भएमा सम्मान गर्ने लगायतका कार्यक्रम पनि जोड्न सकिने गरी तयारी गरिएको सहभागिले बताए ।
कार्यक्रममा कांग्रेस क्षेत्रीय सभापति चण्डीप्रसाद शर्मा, एमाले जिल्ला अध्यक्ष हिराबहादुर केसी, माओवादी नेता यज्ञबल्लब शर्मा, राजमोका नगर अध्यक्ष थानेश्वर सुवेदी, राष्ट्रिय स्वतन्त्र पार्टीका प्रतिनिधि रामप्रसाद अधिकारी, राप्रपाका अध्यक्ष विष्णुप्रसाद सापकोटा र नेकपा एसका अध्यक्ष पिंगलराज गौतमसहित प्रमुख जिल्ला अधिकारी, जनप्रतिनिधि, कार्यालय प्रमुख र सुरक्षा अंगका प्रतिनिधि सहभागि थिए ।