पोखरा/ गण्डकी प्रदेश सभामा राष्ट्रिय प्रजातन्त्र पार्टी संसदीय दलका नेता पंचराम गुरुङले पहिलो र दोस्रो ठुलो दल मिलेर बनेको बलियो सरकारले पनि बलियो रुपमा काम गर्न नसकेको बताएका छन् । प्रदेश सभाको शुक्रबारको बैठकलाई सम्बोधन गर्दै गुरुङले अहिलेको सरकारबाट जनताले ठूलो आशा, भरोसा र विश्वास राखे पनि त्यो पुरा नभएको बताएका हुन ।

प्रथम र दोस्रो ठूलो पार्टी मिलेर बनेको सरकारको यो ६ /७ महिनाको कामकारवाही हेर्दा बलियो रुपमा काम गर्न नसकेको उनको भनाई थियो । ‘हामीले २ वर्षको अन्तरालमा ४ पटकसम्म सरकार अदलीबदली गर्दा जनतामा निराश आएको थियो । जनतालाई आफ्नो ढंगले ब्याख्या गरेर बुझाइयो होला । तर कति बुझेबुझेनन भविष्यमा जनतालेनै विश्लेषण गर्लान्’ गुरुङले भने, ‘गणितका हिसावले यति बलियो सरकार गठन भएको छ । तर ६ /७ महिनाको कार्यकाल हेर्दा सरकारले आफ्नो कार्यक्षेत्रमा बलियो रुपमा काम गर्न नसकेको जननताले भन्न थालेका छन ।’ यसको यसको जवाफदेही सरकार मात्र नभएर हामी प्रदेशका सांसदले पनि हुनुपर्ने उनले बताए । सरकारको धेरै जिम्मेवारी रहे पनि सरकारलाई मात्र पूर्ण दोष दिएर उम्किन नचाहने भन्दै उनले कहीनकही आफ्नो जिम्मेवारी र भूमीका रहेको उनको भनाई थियो ।

उनले यति बलियो सरकारले पनि काम गर्न नसक्दा गम्भिर हुनुपर्ने सयम आएको बताए । अव जनताले छुट दिने अवस्था नरहेको भन्दै गुरुङले सरकारलाई सचेत हुन अनुरोध गरे । जनतालाई दिएका आश्वासन र विश्वास अनि बाँडेका ती बजेट र बिकासका योजनाहरु समयमै पुरा गर्न नसक्ने भए जनतालाई झुक्याएर कतिपटक राजनीति गर्ने भन्ने प्रश्न गर्दैै उनले अव हामी परिवर्तन हुनुपर्ने र सोंचलाई पनि परिवर्तन गर्नुपर्ने बताए ।  यो वा त्यो बाहनामा हामीले गरेका क्रियाकलापलाई अरुलाइ दोष देखाएर कोही पनि उम्कने प्रयास नगर्न उनले अनुरोध गरे । यो सरकार गठन हुदै गर्दा प्रतिपक्षको बेन्चमा बसेर काम हेरेर बिरोध र समर्थन गर्ने भनेको स्मरण गर्दै गुरुङले सरकार अव अल्झिएर र भुलेर बस्ने छुट नभएको भन्दै ध्यानाकर्षण गराए ।

गुरुङले गाउँघरमा जाँदा, आमसमामा भाषण गर्दा जनताले होहल्ला गरेर लखेट्ने परिस्थिति सम्म आइसकेको र त्यो दिन नआओस भन्ने कामना गरे । हामीले नभोगे पनि छिमेकी देशका नेतृत्व कसरी लखेटिए भन्ने देखेको भन्दै उनले यस विषयलाई मध्यनजर गर्नुपर्ने अवस्था आएको बताए । ‘हामी जनताका कामदार हौ, जनताकालागि आएका हौ, नीति र सुशासन कायम गर्र्छै भन्ने प्रतिवद्धतासहित आएका हौ’ उनले भने, ‘अव बोलेर होइन व्यवहारमा काम गरेर देखाउने बेला आएको छ । थोरै बोलेर जनताको मन जित्न सकियो भने राजनीतिक पार्टी र नेता चाहिने रहेछ भन्ने हुन्छ । नभए खादा र माला लगाएका जनताले हामीलाइर्ए खादा र माला अर्कै रुपमा परिणत गर्लान ।’