पोखरा/ पोखराको पृथ्वीनारायण क्याम्पसमा हिजो भएको स्ववियु निर्वाचनको मतगणना आज सुरु भएको छ। बिहान ८ बजेबाट हुने भनिएको मतगणना ढिलो गरि पौने १० बजेमात्र सुरु भएको हो ।
९ हजार २ सय ७० मत रहेको क्याम्पसमा जम्मा २ हजार ८ सय ९७ (३१.२५ प्रतिशत) मतमात्रै खसेको थियो ।
यही चैत ५ गते मतदानको तालिका रहे पनि मतपत्रमा त्रुटी देखिएपछि स्थगीत चुनाव हिजो भएको हो । स्ववियु निर्वाचनमा सभापति पदमा ८ जनाको उम्मेदवारी परेको छ । जसमा कमल सुवेदी र विप्लवी न्यौपाने २ जना स्वतन्त्र उम्मेदवार छन् । एमालेको अनेरास्ववियुबाट विष्णु पोखरेल, कांग्रेसको नेपाल विद्यार्थी संघबाट सुशील न्यौपाने, माओवादीको अनेरास्ववियु क्रान्तिकारीबाट नवीन अधिकारी, अनेरास्ववियू, अखिल समाजवादी र अखिल क्रान्तिकारीको संयुक्त प्यानलबाट सन्तोष पौडेल, प्राज्ञिक विद्यार्थी परिषदबाट दिप्सन गुरुङ र अखिल छैठौंबाट मिलन सुनार सभापतिका उम्मेदवार हुन् ।
समानुपातिकका लागि अध्यक्षको प्यानलमा रहेका बाहेक नयाँ शक्ति विद्यार्थी युनियन, अखिल क्रान्तिकारी (वैद्य) का उम्मेद्वारहरु पनि चुनावी मैदानमा छन् ।
