पोखरा/अमेरिकी नागरिकलाई बन्धक बनाइ तीन लाख रुपैयाँ युरोको माग गर्ने एक महिलालाई कास्की प्रहरीले पक्राउ गरेको छ ।
नुवाकोट बेलकोटगढी नगरपालिका ४ बस्ने ३७ वर्षीया सरिता लामाले पोखराको एक होटलबाट ७० वर्षीया अमेरिकी नागरिकलाई अपहरण गरेकी थिइन् । लामाले अमेरिकी नागरिकलाई मकवानपुर जिल्लाको हेटौंडा उपमहानगरपालिका १९ नेवारपानी पु¥याएकी थिइन् ।
नेपालस्थित अमेरिकी राजदूताबासले आफ्नो देशकी नागरिक अपहरणमा परेको जानकारी गराएपछि कास्की प्रहरीले ती महिलाको खोजी तीव्र पारेको थियो । जिल्ला प्रहरी कार्यालय कास्कीबाट सुरु गरिएको अनुसन्धानमा केन्द्रीय अनुसन्धान ब्यूरो र जिल्ला प्रहरी कार्यालय मकवानपुर पनि मिसिएका थिए ।
प्रहरीको संयुक्त टोलीले अमेरिकी नागरिकलाई अपहरण मुक्त गर्दै लामालाई पक्राउ गरेको कास्की प्रहरीका प्रवक्ता वसन्तकुमार शर्माले जानकारी दिए ।
