पोखरा /जेन जी आन्दोलनको क्रममा २४ भदौमा जिल्ला प्रहरी कार्यालय कास्कीमा आगजनी गर्दा घाइते भएका एकजना प्रदर्शनकारीको शनिवार मृत्यु भएको छ । पोखरा स्वास्थ्य विज्ञान प्रतिष्ठानमा उपचारका क्रममा ४२ वर्षीय विजय लामाको मृत्यु भएको हो ।
जिल्ला प्रहरी प्रवक्ता हरिबहादुर बस्नेतका अनुसार गैह्रापाटनमा रहेको प्रहरी कार्यालय आगजनी गर्ने क्रममा लामा घाइते भएका थिए । उनलाई २४ भदौको राति साढे १० बजे प्रदर्शनकारीले नै जलेर घाइते भएको अवस्थामा उपचारको लागि अस्पताल पुर्याएका थिए । पोखरा–१६ का अस्थायी बासिन्दा लामाको स्थायी ठेगाना खुलिसकेको छैन ।
यसअघि २४ भदौमा पोखरा नयाँबजारमा रहेको हिमालय अर्गनाइजेसनको अटो सोरूम र लेकसाइडमा रहेको अंशुभरा स्क्वायरमा एक–एक महिला जलेर निधन भएको अवस्थामा फेला परेका थिए । उनीहरू व्यावसायिक प्रतिष्ठानका कर्मचारी थिए ।
