बागलुङ/पश्चिम बागलुङको गलकोट नगरपालिका वडा नं. ५ को बसाहफाँटदेखि भैंसे, आँगाखेत, मल्म, पाण्डवखानी हुँदै रणसिंहकिटेनी जोड्ने सडकको स्तरोन्नति गर्न माग गर्दै स्थानीयले सरोकारवालाको ध्यानाकर्षण गराएका छन् ।
सडक सञ्चालनमा आएको लामो समय बितिसक्दा समेत सडक स्तरोन्नतिले गति लिन नसकेको भन्दै स्थानीयले सरोकारवालाको ध्यानाकर्षण गराएका हुन् । सडक स्तरोन्नतिका लागि ठोस पहल थाल्न स्थानीयको माग छ । ‘‘तत्काल सम्बन्धित कार्यालय, जनप्रतिनिधी र निर्माण कम्पनीका प्रतिनिधि सहितको संवादबाट स्तरोन्नतिको काम अघि बढाउनुपर्छ’’ समाजसेवी केहरसिंह थापाले भने ।
यो सडक खण्डअन्तर्गत कालोपत्रको लागि २ वर्ष अघिदेखि काम सुरु भएपनि चालु आर्थिक वर्षको मंसिर लाग्दा समेत सडक स्तरोन्नतिको काम नभएपछि गलकोट नगरपालिका–७ का वडा अध्यक्ष राजबहादुर थापा र निर्माण कम्पनी लो–पूर्ण कन्स्ट्रक्सन प्रा.लि.को ध्यानाकर्षण गराईएको खडग कालिका टोल विकास संस्थाका अध्यक्ष छुमबहादुर थापाले बताए ।
सडकको केही खण्डमा ग्रावेल भएपनि बाँकी सडक स्तरोन्नति नहुँदा हिउँदमा धुलैधुलो, बर्खामा हिलैहिलो, खाल्डाखुल्डी र पक्की नाली नहुँदा यात्री र सवारीसाधनलाई आवागमनमा समस्या हुँदै आएको छ । सरोकारवाला निकायको बेवास्ता र लापरबाहीले विनियोजित बजेट समेत सही सदुपयोग हुन नसकेको भन्दै स्थानीय तह र ठेकेदारको ध्यानाकर्षण गराईएको सरल टोल विकास संस्थाका अध्यक्ष मिन बहादुर थापाले बताए ।
संघीय सरकार अन्तर्गतको बजेटमार्फत ठेक्का भएर केही स्थानमा काम जारी रहेपनि सुस्त गतिमा काम भईरहेको भन्दै स्थानीयले ध्यानाकर्षण गराएका हुन् । स्थानीयको मागलाई सम्बन्धित निकायमा समन्वय र सहजीकरण गर्न आफूहरु प्रतिवद्व रहेको गलकोट–७ मल्मका वडा अध्यक्ष राज बहादुर थापाले प्रतिवद्वता जनाउनुभएको छ ।
