पोखरा/अभिनेत्री माया गुरुङले सहारा फुटबल एकेडेमीका बालकहरुलाई फुटबल बुट सहयोग गरेकी छन् ।
पोखरा रंगशालामा चलिरहेको २५ औं संस्करणको आहा रारा पोखरा गोल्डकप अवसरमा उनले एकेडेमीका ३० जना बालकहरुका निम्ति ३० जोडी फुटबल बुट सहयोग गरेकी हुन् । सहारा हङकङका सल्लाहकार समेत रहेकी अभिनेत्री गुरुङले यसअघि पनि एकेडेमीमा सहयोग गर्दै आएकी थिइन् ।
उनको निर्माणमा बनेको नेपाली फिल्म ‘पेन्सनपट्टा’ले दुई साताअघि मात्र छायांकन सकाएको छ । लमजुङ लगायतमा छायाकन गरिएको यो फिल्मका निर्देशक माओत्से गुरुङ हुन् । जहाँ, माया आफैँै पनि अभिनय गरेकी छन् ।
आफ्ना छोरा हिमाल गुरुङको जन्मोत्सवको अवसरमा एकेडेमीका बालकलाई सहयोग गर्न पाउँदा सन्तुष्टि मिलेको गुरुङले प्रतिक्रिया दिइन् ।
यसैबीच, ट्रडर्स जेएन एफ.सी. हङकङको प्रायोजन एवं आकाश राईद्वारा एकेडेमीका बालकलाई १० थान फुटबल सहयोग गरिएको थियो ।
