बागलुङ / नेकपा एमाले बागलुङ क्षेत्र नं २ का उमेद्वार मञ्जु शर्मा चालिसेले सामाजिक सञ्जालको लहरभन्दा भूगोलमा मतदाताको वास्तविक दुःख र आवश्यकता बुझ्ने प्रतिनिधि खोजेको बताएकी छन् ।
नेकपा एमाले बडिगाड २, खर्वाङको आयोजनामा भएको अगुवा कार्यकर्ता भेटघाट कार्यक्रममा चालिसेले आफुले स्वास्थ्य क्षेत्रमा काम गर्दा गाउँगाउँ पुगेर सेवा गरेको अनुभव सुनाउँदै भूगोलको समस्या बुझ्ने र स्थानिय भावना अनुसार काम गर्न सक्ने नेतृत्व आवश्यकता भएको बताएकी छन् ।
नेकपा एमालेको केन्द्रिय सदस्य चालिसेले महिलाहरुको नेतृत्व सुदृढिकरणका क्षेत्रमा निरन्तर काम गर्दै आएको बताउँदै पदका लागि मात्रै उमेद्वार नबनेको स्पष्ट पारिन् ।
विकास क्रमवद्ध भैरहने प्रक्रिया भएको तर गुणस्तरीय र दिगो विकास आजको आवश्यकता रहेको बताउँदै चालिसेले नवयुवाको चाहना अनुरुपको सुसासनको क्षेत्रमा काम गर्ने प्रतिवद्धता व्यक्त गरिन् ।
कार्यक्रममा नेकपा एमाले गण्डकी प्रदेश कमिटी सचिवालय सदस्य बाबुराम नेपालीले स्थिर सरकार र सुशासनका लागि एमालेको जित आवश्यक रहेको बताउदै देशको राष्ट्रियता कमजोर भएकोबेला एकजुट भएर देश जोगाउनुपर्ने बेला आएको बताए ।
नेकपा एमाले बागलुङका कार्यवाहक अध्यक्ष एवं निर्वाचन परिचालन कमिटिका संयोजक विष्णु प्रसाद भुसालले एमालेसंग स्पष्ट निति, विचार र देश बनाउने खाका रहेको भन्दै उच्च आत्मबलका साथ निर्वाचनमा खटिन कार्यकर्ताहरुलाई निर्देशन दिए ।
विगतमा गठनबन्धनको विरुद्ध एक्लै उभिँदा उपविजेता बन्नुपरेको भन्दै यसपटक जित सुनिश्चत भएको बताए । कार्यक्रम वडा कमिटि अध्यक्ष खगिश्वर अर्यालको अध्यक्षता तथा सचिव लेखक पुनको सञ्चालनमा सम्पन्न भएको थियो ।
एमालेले निसिखोला, तमानखोला, ताराखोला र बडिगाड गाउँपालिका तथा ढोरपाटन नगरपालिकामा उमेदवारसंगको भेटघाट सहितका कार्यक्रम सम्पन्न गरेको छ। भोलीदेखि गल्कोट नगरपालिका र ताराखोलामा भेटघाट कार्यक्रम हुने र सबै वडामा निर्वाचन परिचालन कमिटी सहितको घरदैलो कार्यक्रम फागुन १८ गते सम्म नियमित चल्ने एमालेले जनाएको छ ।
