गोरखा / इरानको ड्रोन आक्रमणमा परी यूएईको अबुधाबीमा ज्यान गुमाएका गोरखाको भीमसेन थापा गाउँपालिका–७ बोर्लाङ ठाँठीका दिवस श्रेष्ठको शव नेपाल ल्याएर पशुपतिमा अन्तिम संस्कार गरिएको छ । उनको शव एयर अरेबियाको उडानमार्फत शनिवार ल्याइएको थियो ।
भीमसेन थापा–७ का वडाध्यक्ष नारायण श्रेष्ठका अनुसार दिवसको १३ दिने काजक्रियामा उनका बुबा चामबहादुर बसेका छन् । बोर्लाङको घरमा काजकिरियाको काम सुरु भएको उनले बताए । दिवस परिवारका एक्ला छोरा हुन् ।
ड्रोन आक्रमणमा परेका दिवसको टाउको पछाडिको भागमा बढी चोट लागेको वडाध्यक्ष श्रेष्ठले बताए । दिवस डेढ वर्षअघि मात्र रोजगारीका लागि मिडल इस्ट कम्पनीमार्फत सेक्युरिटी गार्डको रुपमा काम गर्न यूएई पुगेका थिए ।
