पोखरा, ७ जेठ – गुरुङ अर्थात् तमुहरुको अग्रणी सामाजिक संस्था तमु धिँ नेपालको ३५ आँै स्थापना दिवस आइतवार सम्पन्न भएको छ। संघ संस्था खोल्न प्रतिवन्धित भएको निर्दलीय पञ्चायती घेराभित्र २०४२ साल जेठ ५ गते पोखरामा तमु धिँको गठन गरिएको थियो ।
यसैबीच तमु धिँले आफ्नो स्थापना दिवसको अवसरमा तमु धिँ नेपालद्धारा स्थापना गरिएको उच्च शिक्षा प्राप्त गरी समाजसेवामा जुटेकोमा हुमबहादुर तमुलाई स्व.हर्क—चन्द्र—सन्त तमु स्मृति उच्च शिक्षा समाजसेवा पुरस्कारबाट सम्मानित गरिएको छ । सम्मानमा नगद २० हजार रुपैयाँ समेत रहेको थियो । स्व.कर्णेल तिर्थकुमारी समाज सेवा पुरस्कारबाट तमु धिं नेपाल पुर्व व्यवस्थापन संयोजक पदमबहादुर तमु, तमु आदिकवि हर्कबहादुर तमु स्मृति पुरस्कारबाट साहित्य तर्फ पाठशाला उपन्यासका लेखक तीर्थ तमु र समाजसेवा तर्फ ल्वाङघलेल तमु समाजकी अध्यक्ष डमरकुमारी तमु जनही १५ हजार रुपैयाँसहित सम्मानित भए । तमु भाषा संरक्षण वापत स्व.घनबहादुर लामिछाने तमु स्मृति पुरस्कारबाट त्रिभाषिक(अंग्रेजी, तमु, नेपाली) शब्दकोष लेखक ई.खेमबहादुर तमु, विशेष साहित्यिक श्रष्टा सम्मानबाट अनेसास युके च्याप्टरका अध्यक्ष सुमलकुमार तमुलाई सम्मान गरिएको थियो।