बागलुङ, २१ असार– बाँदरले बाली खाएर मर्कामा परेका किसानको माग सम्बोधन गर्दै जिल्लाको काठेखोला गाउँपालिकाले बाँदर धपाउने मेसिन वितरण गरेको छ । आईतबार गाउँपालिकाले आठवटै वडाका किसानहरुलाई बाँदर धपाउने बन्दुक (आधुनिक मेसिन) वितरण गरेको हो ।
बाँदरको समस्या धेरै रहेका गाउँहरुको पहिचान गरेर कृषि शाखाको सल्लाहका आधारमा २६ वटा मेसिन वितरण गरिएको गाउँकार्यपालिका सदस्य टिका संगम बिकले बताए । मेसिन वितरण गर्दै गाउँपालिका अध्यक्ष अमर थापाले किसानका समस्या समाधानगर्न स्थानीय सरकार सधैं साथमा रहेको बताए ।
बाँदरका कारण खाद्यान्न, तरकारी र फलफुलबालीमा समेत क्षति पुग्दै आएको भन्दै किसानहरुले गुनासो गर्दै आएका थिए । नेपालमै बिकास भएको बाँदर धपाउने प्लाष्टिक बम गाउँपालिकाले खरिद गरेर वितरण गरेको हो ।किसानलाई वितरण गरिएको मेसिनले उत्पादन जोगाउन सहयोग गर्ने गाउँपालिकाको आर्थिक बिकास समितिका संयोजक युक्त प्रसाद कँडेलले बताए ।