तनहुँ, ३० साउन – जिल्लाको भानु नगरपालिका – १ मा शुक्रबार एकैदिन समुदायस्तरमा २० जनालाई कोरोना संक्रमणको पुष्टी भएको छ । गत सोमबार संक्रमित ३४ बर्षिय निर्माण व्यवसायीको सम्पर्कमा आएका १४ जना पुरुष र ६ जना महिलामा संक्रमण देखएको हो । २७, ४९, ३९, २८, ५२, २२, ४०, ३४, ४३, ३७, ५०, ४०, २८, ३५ वर्षीय पुरुष र ५, ३१, २८, ३०, ५६ र ३७ वर्षीया महिलामा कोरोना पुष्टि भएको छ ।
दुई जना प्रहरी र एक जना कर्मचारीलाई संक्रमण पुष्टी भएको स्वास्थ्य शाखा प्रमुख ऐश्वर्यचन्द« भट्टराईले जानकारी दिए । उनका अनुसार मासु पसल र वर्कसप सञ्चालकलाई पनि संक्रमण देखिएको छ । उनीहरुलाई जिपी कोईराला राष्ट्रिय श्वासप्रश्वास उपचार केन्द्र बेलचौताराको आईसोलेसनमा लैजाने तयारी भएको उनले बताए । ‘यस्ले गर्दा स्थिती भयावह भएको छ । उनीहरुको सम्पर्कमा आएकाको कन्ट्याक ट्रेसिङ गर्दैछौँ’, भट्टराईले भने । नगरक्षेत्रमा निषेधाज्ञा नै जारी गर्ने तयारी भएको उनले बताए । गएको सोमबारदेखी एक हप्ताको लागी लकडाउन गरिएको छ ।
मंगलबार कन्ट्याक्ट ट्रेसिङबाट १ सय २२ जनाको पिसीआर परीक्षण गरिएको थियो । तीमध्ये शुक्रबार ८५ जनाको मात्र रिपोर्ट आएको हो । बाँकी रिपोर्ट पनि आजै आउने जनाईएको छ । क्षयरोग उपाचार केन्द्र पोखरामा उनीहरुको स्वाब परिक्षण गरिएको हो । स्वाब सङ्कलनको क्रममै १५÷२० जनालाई रुघाखोकी र ज्वरोको लक्षण देखिएको थियो ।
तनहुँमा पछिल्लो साता समुदायस्तरमा भानु नगरपालिका, बन्दीपुर गाउँपालिका र देवघाट गाउँपालिकामा एक÷एक जनालाई समुदायस्तरमा संक्रमण देखिएको थियो ।
यसैबिच, भानु नगरपालिका–१ का २० जना समुदायका व्यक्तिमा कोरोना पुष्टि भएपछि बन्दीपुर गाउँपालिकाले तीन वडा सिल गरेको छ । वडा नम्बर १, ४ र ५ का राजमार्ग क्षेत्र पूर्ण रुपमा सिल गर्ने निर्णय भएको अध्यक्ष पुर्णसिंह थापाले जानकारी दिए । थापाका अनुसार बजार क्षेत्रका सबै व्यापार, व्यवसाय, वित्तीय संस्था एक हप्ताका लागि बन्द हुनेछ ।