काठमाण्डौ, २३ असोज– संक्रमण पुष्टि भएका बिरामी यत्रतत्र हिँड्न थालेपछि सरकारले कडाईका साथ अनुगमन गर्न माताहतका निकायलाई निर्देशन दिएको छ । संक्रमितहरुले आइसोलेसनको नियम पालना नगरेको गुनासो बढेपछि सरकारले कडाइका साथ अनुमगन गर्न सम्बन्धित निकायलाई निर्देशन दिएको हो । स्वास्थ्य तथा जनसंख्या मन्त्रालयका प्रवक्ता प्राध्यापक डाक्टर जागेश्वर गौतमले शुक्रबार भएको नियमित मिडिया ब्रिफिङका क्रममा कोभिड–१९ पोजेटिभ भएका व्यक्तिहरु आइसोलेसनमा नबसेको रिपोर्ट आएकाले त्यस्तो भएमा कारवाही हुने उल्लेख गरे ।
‘कोरोना संक्रमितहरु आइसोलेसनमा नबसेको रिपोर्ट प्राप्त भएको छ । त्यस्तो अवस्थामा घर परिवार र छिमेकीले पनि अनुमगन गरी खबर गरिदिनु होला’ उनले भने, ‘पोजेटिभ आएको व्यक्ति आइसोलेसनमा नबसी बाहिर हिँडेको र अरुको सम्पर्कमा आएको छभने संक्रामक रोग कानुन अनुसार ६ महिना जेल हुन्छ। सरकारले कडाइका साथ कारवाही गर्ने छ ।’
गौतमले आइसोलेसनमा नबस्ने व्यक्तिको अनुगमन गर्न स्थानीयवासीलाई पनि अपिल गरेका छन् । ‘कोरोना संक्रमित बाहिर निस्किँदा अरुमा सर्ने हुँदा ख्याल गरौं । धेरै जसो लक्षण नभएका संक्रमितबाट अरुलाई सार्ने जोखिम हुन्छ । घरमा आइसोलेसनमा बस्ने ठाउँ छभने घरमै बसौं’ उनले भने, ‘पिसिआर गरेपछि अनिवार्य क्वारेन्टाइनमा बस्नू, पोजेटिभ आएमा अरुलाई सर्न सक्ने हुन्छ, त्यसैले परीक्षण गर्न दिइसकेपछि रिपोर्ट नआएसम्म क्वारेन्टाइनमा बस्नु पर्छ ।’
