बागलुङ, १८ पुस– सिम्रिक कृषि तथा पशु व्यवसायीक सहकारी संस्था लिमिटेड बागलुङले स्थापना गरेको ‘कृषि पत्रकारीता पुरस्कार’ गोरखापत्र दैनिकका गण्डकी प्रदेश संयोजक चन्द्रप्रकाश शर्मा ‘गणेश’लाई प्रदान गरिएको छ । सहकारीले आफ्नो साधारणसभाका अबसरमा शनिवार उक्त पुरस्कार समर्पण गरेको हो । जिल्ला सहकारी संघका अध्यक्ष दिपक गौतमले उनलाई एक हजार पाँच सय रुपैयाँ नगद सहित दोसल्ला ओडाएर सम्मान गरे । सहकारीले कृषि क्षेत्रमा कलम चलाउने एक जना पत्रकारलाई हरेक बर्ष पुरस्कृत गर्दै आएको छ ।
‘आर्थिक पत्रकारिता पुरस्कार’ राजभण्डारीलाई
बागलुङ उद्योग वाणिज्य सङ्घमा स्थापित ‘आर्थिक पत्रकारिता पुरस्कार’ नयाँ विश्व अनलाइनका सम्पादक मुकेशचन्द्र राजभण्डारीलाई प्रदान गरिएको छ । रु ११ हजार १११ राशिको सो पुरस्कार आज आयोजित सङ्घको ५७ औँ साधारणसभामा पूर्वप्रधानन्यायाधीश कल्याण श्रेष्ठ र नेपाल उद्योग वाणिज्य महासङ्घका वरिष्ठ उपाध्यक्ष चन्द्रप्रसाद ढकालले संयुक्तरूपमा राजभण्डारीलाई प्रदान गरे ।
पुरस्कारका लागि सङ्घले गत वर्ष पुसमा सञ्चालित बागलुङ महोत्सवमा बचत भएको रकमबाट रु दुई लाख २२ हजार २२२ को अक्षयकोष स्थापना गरेको थियो । आर्थिक विषयमा कलम चलाउने पत्रकारलाई बर्सेनि पुरस्कृत गरिने सङ्घका महासचिव नरेश कँडेलले जानकारी दिए । नेपाल पत्रकार महासङ्घ बागलुङ शाखाका पूर्वअध्यक्षसमेत रहेका राजभण्डारीले पहिलो पुरस्कार प्राप्त गरेका हुन् ।
