बागलुङ, २७ जेठ– एक साता पहिलेसम्म दिनमा २० जना भन्दा धेरैको कोरोना संक्रमणबाट मृत्यु भएको सूचना सार्वजनिक गरिरहेको गण्डकी स्वास्थ्य निर्देशनालयले पछिल्लो एक सातायता सार्वजनिक गर्ने सूचनामा मृतकको संख्या घटेको छ । कोरोना संक्रमण पुष्टि भएपछि मृत्यु भएकाको मात्रै तथ्यांक सरकारी निकायले राख्छ । मिल्दाजुल्दा लक्षण र जाँचपूर्व मृत्यु भएकाको भने कुनै लेखाजोखा छैन् । जाँच, संक्रमण र मृत्युदर सबै एकैपटक घट्दै गएको छ । स्वास्थ्य निर्देशनालयका निर्देशक विनोदविन्दु शर्माका अनुसार महामारीको दोस्रो लहर सुरुभएका केही दिनयता आरटी पिसिआर रिपोर्ट आउन ७ दिनसम्म लाग्यो । कारण जाँचका लागि लिइएको थ्रोट स्वावको चाप धेरै थियो । अहिले बढीमा ३६ घण्टामा रिपोर्ट आउँछ । दैनिक संकलन हुने स्वावको संख्या घटेको तथ्यांक निर्देशनालयसँग छ ।
कोरोना महामारीको दोस्रो लहर चलेपछि गण्डकीमा अक्सिजनको चरम अभाव भयो । प्रदेशकै मुख्य अस्पताल गण्डकी अस्पतालमा एकैदिन– एकैपटक ६ जनाको अक्सिजनकै अभावका कारण मृत्यु भएको दुरावस्था गण्डकीले व्यहो¥यो । यो दुरावस्था व्यहोरेको गण्डकीले अहिले भने शैया, आइसीयु, अक्सिजन लगायतका कुनैपनि समस्या नरहेको दावी गर्न थालेको छ ।
‘अक्सिजनमा हामी अन्य प्रदेश भन्दा अब्बल छौं, यहाँ अब समस्या छैन’, पत्रकार महासंघ गण्डकीले बुधबार आयोजना गरेको भर्चुअल छलफलमा शर्माले भने, ‘शैयाको अवस्था पनि अन्यत्र भन्दा राम्रो छ, जनशक्ति सन्तुलित छ ।’ शर्माले गण्डकीको मृत्युदर धेरै देखिनुमा बाहिरबाट आएका बिरामीको चाप धेरै भएको बताए ।
पोखरामा राम्रो अस्पतालको खोजीमा आउने गम्भीर बिरामीहरुको मृत्युहुँदा तथ्यांक गण्डकीले राख्नुपर्ने उनले बताए । ‘काठमाण्डौबाट हेलिकप्टर चढेर आउने, अन्य प्रदेशबाट स–परिवार एम्बुलेन्स लिएर आउनेहरुका कारण यहाँको संख्या बढेको हो’, उनले दावीका साथ भने,‘गण्डकीको वास्तविक मृत्युदर तथ्यांक भन्दा कम छ ।’ गण्डकीमा यो समाचार तयार पर्दासम्म ७ सय ८९ जनाको मृत्यु भएको तथ्यांक छ । पछिल्लो २४ घण्टामा एक हजार २ सय ८२ जनाको मात्रै जाँच भएको छ ।
शर्माले ३ सय ७० जना चिकित्सक, स्वास्थ्यकर्मी र नर्ससहितको जनशक्ति प्रदेशले नै व्यवस्थापन गरेर मौजुदा जनशक्तिलाई सहयोग गर्नेगरी गण्डकी प्रदेशभर परिचालन गरेको बताए । उनले सम्भावित तेत्रो लहरका लागिसमेत तयारी भैरहेको बताए । ‘पाचौं लहरसम्म पुग्दा हामी खोप लगाएर सुरक्षित भैसकेका हुने छौं, तेस्रो लहरमा विज्ञले आँकलन गरेको जस्तो बालबालिका प्रभावित हुने भनेर एनआइसीयु र अन्य पूर्वाधारको तयारमा छौं’, उनले भने । सहरहरुमा निशेधाज्ञाले कोरोनाको चेन ब्रेक भएको भएपनि गाउँहरुमा अझै समस्या रहेको शर्माको भनाई थियो । पत्रकारहरुले गण्डकीले दिने सूचना, खोप, उपचार तथा खोजपड्तालमा भएका कमजोरीलगायतका विषयमा चासो राखेका थिए ।