पोखरा, ४ असार – विश्वासको मत पाउनेमा ढुक्क रहेका गण्डकीका मुख्यमन्त्री कृष्णचन्द्र नेपालीले आफ्नो कार्यकालमा विपक्षीको कडा सामना गर्नुपर्ने देखिएको छ । स्थायित्वको लागि विश्वासको मत मागेपछि सदनमा बोल्न आएका विपक्षी सांसदहरुको अभिव्यक्तिले त्यो छनक दिएको हो ।
विश्वासको मतको विपक्ष बोल्न रोष्टममा उभिएका अधिकांश एमाले सांसदहरुले तर्क, उखान–टुक्का र आरोपसहित सरकार अपवित्र भएको जिकिर गरे । उनीहरुले नयाँ सरकार गठन हुुनु र प्रदेशमा आएको बाढीपहिरोको संयोगलाई पनि अपसकुनको रुपमा व्याख्या गर्न भ्याए ।
एमाले सभासद कृष्ण थापाले यो सरकार बन्नासाथ प्रदेशमा बाढीपहिरो आएको विषयमात्रै उठान गरेनन्, कम्युनिष्ट प्रधानमन्त्री मनमोहन अधिकारीको स्मरण गर्दै मुख्यमन्त्री कृष्णचन्द्र नेपालीलाई वृद्धभत्ता खाने उमेरको भन्दै व्यङ्ग्य पनि गर्न भ्याए । भारतीय कविको कवितांश स्मरण गर्दै यो सरकारमा गुण्डाहरुलाई मन्त्री बनाइएको आरोप लगाए । उनको संकेत आपराधिक पृष्ठभूमिबाट राजनीतिमा उदाएका दीपक मनाङेप्रति लक्षित थियो । यद्यपि, मनाङेलाई उनकै पार्टी एमालेले राजनीतिमा ल्याएको थियो ।
लगत्तै सभासद मिना गुरुङले सरकारले पुरानै कार्यक्रमलाई निरन्तरता दिएको भएपनि कमजोर धरातलमा उभिएको टिप्पणी गरिन् । एमाले सभासद धनञ्जय दवाडीले मुख्यमन्त्रीतिर फर्कँदै भने,‘तपाइँको पार्टी( कांग्रेस)लाई दस्तावेजको हिसाबले माओवादी केन्द्रले दुश्मन मान्छ । यो गठबन्धनमा संघीयता नमान्ने पनि छन्, संघीयताका पक्षधर पनि छन् त्यसैले यो अराजनीतिक हो, अप्राकृतिक हो’, भने ।
अर्का विपक्षी सभासद मनबहादुर गुरुङले यो सरकारले कास्कीकै बाढीपहिरो पीडितको समस्याप्रति उदाशिसता देखाएको आरोप लगाए । सभासद राजिव पहारीले यो सरकार नै केन्द्रको चोचोमोचोमा बनेको जिकिर गर्दै सरकार न हाँसको न बकुल्लाको चालजस्तो भएको टिप्पणी गरे । विश्वासको मत किन छिटो लिएको भन्ने प्रश्न गर्दै उनले ११ मन्त्री बनाउने तयारीले फजुल खर्च बढाउने बताए । यद्यपि, मन्त्रालय यसअघिकै सरकारले फुटाएको तथ्यबारे भने उनले चर्चा गरेनन् ।
सत्तापक्षीय सभासदले चाहिँ विपक्षीको भनाईको बचाउ गरिरहेका छन् । विपक्षी सभासद ओमकला गौतमले विपक्षीले भनेजस्तो यो सरकार खिचडी नभएको र समयको आवश्यकता भएको बताइन् । हिजो आफ्नो गठबन्धनमा हुँदा त्यही व्यक्ति राम्रो हुने र आज अर्को गठबन्धनमा जाँदा त्यही व्यक्ति पवित्र हुने आज अपवित्र नहुने उनको तर्क थियो ।
सरकारलाई सघाएको राष्ट्रिय जनमोर्चाकी सभासद पियारी थापाले नयाँ सरकार जनताबाट चुनिएको र गठबन्धनबाट म्याण्डेट पाएको बताइन् । उनले गुण र दोषको आधारमा नयाँ सरकारलाई समर्थन वा विरोध गर्ने बताइन् ।