पोखरा/ ४२ औं विश्व पर्यटन दिवसका अवसरमा विभिन्न देशका राजदुतलाई पदयात्रा गराउन पर्यटन मजदुरलाई पदमार्ग सरसफाइमा खटाइएको छ । नेपाल पर्यटन बोर्डले संयुक्त राष्ट्र संघीय विकास कार्यक्रमसँग मिलेर लकडाउनका कारण बेरोजगार बनेका पर्यटक गाइड तथा पोर्टरलाई सरसफाइमा खटाएको हो ।
पोखराको कास्कीकोटमा एक कार्यक्रमको आयोजना गरी पर्यटन बोर्ड गण्डकीका प्रमुख काशीराज भण्डारीले सरसफाइ अभियानको शुरुवात गरे । सो अवसरमा सरसफाइमा हिडेका ६ महिलासहित ३० जना गाइड तथा पोर्टरलाई सरसफाइ सामग्री हस्तातरण गरिएको थियो ।
विश्व पर्यटन दिवसका अवसरमा यही सेप्टेम्बर २७ (असोज ११) गते पोखरा आसपासका पदमार्गमा विभिन्न देशका राजदुतसहित विदेशी नियोगका प्रमुखहरुलाई पदयात्रा गराउने कार्यक्रम तय भएको छ । पर्यटन बोर्डका अनुसार युएई, कतार, जर्मनी, थाइल्याण्ड, फिनल्याण्ड, श्रीलङ्का, साउदी अरब, कोरिया, इजिप्टलगायतका देशका राजदूत पदयात्रामा आउनेछन् ।
यस्तै, सार्कका महासचिव, संयुक्त राष्ट्र संघका आवासीय संयोजक, इसिमोटका महानिर्देशक, युएन एडका नेपाल निर्देशक, युएनडिपी, युनेस्को, विश्व खाद्य कार्यक्रम लगायतका नियोगका प्रमुखहरु पदयात्रामा सहभागी हुने पर्यटन बोर्डले जनाएको छ ।
संयुक्त राष्ट्र संघीय विकास कार्यक्रमअन्तर्गत जीविकोपार्जन पुनरुत्थानका लागि दिगो पर्यटन परियोजनाको सहयोगमा दैनिक एक हजार रुपैया दिनेगरी पर्यटन मजदुरलाई पदमार्ग सफाइमा खटाइएको छ । भत्किएका पदमार्ग मर्मत सम्भार र सरफाइका लागि विभिन्न चरणमा २ सय जना पर्यटक खटाइने पर्यटन बोर्ड गण्डकीका प्रमुख भण्डारीले बताए ।
कास्कीकोटबाट शुरु भएको सफाई अभियान नौडाँडा–कास्कीकोट–सराङकोट–मेथलाङहुँदै पोखराको जरेबरमा समापन हुनेछ । उक्त अभियान १० दिनसम्म चल्ने जनाएको छ । यस्तै, लेकसाइडदेखि पञ्चासेसम्म र मर्दी पदमार्ग पनि सरसफाइ गर्ने कार्यक्रम रहेको भण्डारीले जानकारी दिए ।
