पोखरा – पोखरा नगरपालिकाका पूर्व मेयर गणेश शेरचनको निधन भएको छ । राप्रपाका नेता समेत रहेका शेरचनको ७८ वर्षको उमेरमा निधन भएको छ ।
मधुमेह र मिर्गौलाको समस्याबाट पीडित शेरचनको आइतबार बिहान ग्राण्डी अस्पतालमा उपचारको क्रममा निधन भएको राप्रपाका प्रवक्ता मोहन श्रेष्ठले जानकारी दिए ।
शेरचन राप्रपाको संस्थापक नेता एवम् तत्कालीन राप्रपा नेपालको महामन्त्री हुन् । राजाको प्रत्यक्ष शासनकालमा उनी क्षेत्रीय प्रशासकसमेत थिए ।
राप्रपाका अध्यक्ष राजेन्द्र लिङ्देनले शेरचनको निधनबाट आफू दुःखी र स्तब्ध भएको बताएका छन् ।
पोखरा नगर पञ्चायतमा शेरचन २०३७ पछि प्रधानपञ्च भएका थिए । त्यसपछि उनी कास्कीबाट राष्ट्रिय पञ्चायत सदस्य निर्वाचित भएका थिए । तत्कालीन प्रधानमन्त्री सूर्यबहादुर थापाका पालामा शेरचन सञ्चार सहायक मन्त्री भएका थिए ।
पोखरा अर्चलबोटका शेरचन पृथ्वीनारायण क्याम्पसको स्ववियु सभापति पनि भएका हुन् । त्यति बेला उनी कम्युनिस्ट पार्टीसँग नजिक थिए । पछि उनी पञ्चायतको समर्थक भएका हुन् । पञ्च भइकन पनि उनी उदारवादी मानिन्थे ।
