फिफा विश्वकपको एक पटकको विजेता इटाली छनोट चरणबाटै बाहिरीएको छ । फिफा विश्वकप २०२२ अन्तरगतको प्ले अफ अन्तरगत सेमिफाइनल खेलमा नर्थ म्यासेडोनियासँग १–० को हार व्यहोर्दै छनोट चरणबाट बाहिरीएको हो ।
गतवर्षको युरोकपको च्याम्पियन समेत रहेको इटाली विश्वकपमा छनोट हुन असफल रह्यो । इटालीलाई स्तब्ध पार्न इन्ज्युरी समयको थप गरिएको दोस्रो मिनेटमा एलेक्सान्डर ट्राजकोभ्स्कीले गरेको गोल नै निर्णायक बन्यो ।
घरेलु मैदानमा बिहीबार राति भएको खेलमा इटालीले नर्थ म्यासेडोनियामाथि दबाब राखेपनि गोल गर्न नसक्दा हार व्यहोर्न बाध्य भएको हो ।
इटाली लगातार दोस्रो पटक विश्वकप छनोट चरणबाटै बाहिरीएको हो । यसअघि इटाली २०१८ को विश्वकपमा पनि छनोट चरणबाट बाहिरीएको थियो ।
आठ महिनाअघि मात्र रोबार्टो मान्चिनीको टोलीले इंग्ल्याण्डलाई वेम्बलीमा हराउँदै सन् २०२० को युरोकपको उपाधि जितेको थियो ।
विश्वकप छनोटमा इटाली घरेलु मैदानमा ५९ खेलसम्म अपराजित रहेको थियो ।
जसमा ४८ जित र ११ बराबरी रहेको थियो । अब नर्थ म्यासेडोनियाले विश्वकपमा स्थान पक्का गर्न प्ले अफको फाइनलमा २९ मार्चमा पोर्चुगलसँग खेल्नेछ ।
पोर्चुगलले बिहीबार राति नै टर्कीलाई ३–१ ले पराजित गर्दै विश्वकपको छनोट नजिक पुगेको छ ।
