पोखरा/ गण्डकी प्रदेशमा रहेका ११ जिल्लाका जिल्ला खेलकुद विकास समितिका अध्यक्ष सहितको पदाधिकारीले चित्त बुझ्दो जवाफ नदिएको भन्दै पदबाट हटाउने निर्णय गरेको छ ।
गण्डकी प्रदेश मन्त्री परिषद्को निर्णयबाट वर्खास्त गरिएको हो । गण्डकी प्रदेशका प्रवक्ता एवम् भौतिक पुर्वधार तथा यातायात मन्त्री कुमार खड्काले जानकारी दिए ।
‘जिल्ला खेलकुद विकास समितिका पदाधिकारीको काम प्रति असन्तुष्टि रहेको भन्दै जिल्ला खेलकुद विकास समितिका ११ जिल्लाका सदस्यहरुलाई वहाँको कार्यबाट सन्तोजनक नभएको र पदाधिकारीहरुलाई हटाउने निर्णय गरेको छ’ उनले भने ।
प्रत्येक जिल्लामा १३ सदस्य गरी कुल १ सय ४३ जना पदबाट बर्खास्त भएका हुन् । तत्कालिन मुख्यमन्त्री पृथ्वी सुब्बा गुरुङले समिति गठन गरेका थिए ।
गत ४ गते गण्डकी प्रदेश युवा तथा खेलकुद मन्त्रालयले प्रदेशका ११ वटै जिल्ला खेलकुद विकास समितिमा राजनैतिक नियुक्त भएका अध्यक्षहरुलाई लिखित स्पष्टीकरण मागेको थियो । अध्यक्षहरुकै नाममा परिपत्र गर्दै स्पष्टीकरण पेश गर्न निर्देशन गरेको थियो ।
