बागलुङ/स्थानीय तहको निर्वाचनमा बागलुङको जैमिनी नगर प्रमुखमा राष्ट्रिय जनमोर्चाका नरबहादुर पुन निर्वाचित भएका छन् । उनले एमालेका लीलाबहादुर रानालाई ठूलो मतान्तरमा पराजित गरे । पुनले ८ हजार ७ सय ५५मत ल्याउ“दा रानाले २ हजार ८ सय ७३ मात्रै मत पाए ।
उपप्रमुखमा कांग्रेसका हरिहर शर्मा बिजयी भए । शर्माले ९ हजार १ सय ७३मत ल्याए । एमालेकी उशा पौडेलले २ हजार ६ सय ३६ मात्रै मत पाइन् । पुन यस अघिको निर्वाचनमा कांग्रेसबाटै पराजित उमेदवार हुन् । यो पटक गठबन्धनमा उमेदवार बन्दा कांग्रेस र माओवादी समेतको साथ थियो । शर्मा बिद्यार्थी राजनीतिबाट आएका हुन् । नेविसंघको जिल्ला अध्यक्ष, केन्द्रीय सहमहामन्त्री सम्म भएका शर्मा जिल्लाको लोकप्रिय युवा नेतामा गनिन्छन् ।
जैमिनी नगरपालिकाको १० वटा वडा मध्ये वडा नं. १, २, ५, ७ र ८ गरी पाँचवटा वडा कांग्रेसले जितेको छ । वडा नंं ४ नेकपा एस, वडा नंं ६ माओवादी, वडा नंं ९ एमाले र वडा नंं ३ र १० गरी दुइवटा वडा राजमोले जित हात पारेको छ ।
