बागलुङ/ बागलुङको बरेङ गाउँपालिकाका एक वडाअध्यक्षले चालु आर्थिक बर्षको मालपोत कर व्यक्तिगत खर्चमा तिर्ने घोषणा गरेका छन् । बरेङ गाउँपालिका–३ बाटाचौरका नवनिर्वाचित वडाअध्यक्ष शेरबहादुर खनालले वडाभरीका विपन्न तथा गरिव परिवारको मालपोत कर आफूले व्यक्तिगत खर्चमा तिरिदिने घोषणा गरेका हुन् ।

बुधबार गाउँ कार्यपालिकाको पहिलो बैठकबाट आफ्नो प्रस्ताव अनुमोदन गराएर खनालले चालु आर्थिक वर्षको जेठ अन्तिम सातासम्म पनि मालपोत कर नतिरेका सबै वडावासीको कर तिरीदिने घोषणा गरेका हुन् । उनी बरेङ गाउँपालिकामा नेकपा एमालेबाट निर्वाचित एक्ला जनप्रतिनिधि हुन् । ‘यहाँ गरीब विपन्न छन्, मालपोत कर तिर्न नसकेका कारण समस्यामा रहेका नागरिक पनि छन्, हामीले उनीहरुको लागि केही न केही त गर्नैपर्छ’, खनालले भने ‘हालसम्म नतिरेको जो कोही भएपनि मैले चालु वर्षको सबै कर तिरिदिने घोषणा गरेको छु ।’

वडा कार्यालयको गत वर्षको तथ्यांक अनुसार झण्डै २ लाख भन्दा बढी मालपोत कर उठ्न बाँकी छ । त्यो रकम सबै वडा अध्यक्ष आफैले व्यक्तिगत रुपमा जम्मा गरिदिने छन् । ४ आना देखि १ सय ९२ रोपनीसम्म जग्गा भएकाहरुले मालपोत कर तिरेका छैनन् । ‘मेरो मनसाय गरीब तथा विपन्नले राहत पाउन भन्ने हो, छुटेकामध्ये धनी पनि रहेछन्, जे भए पनि हाम्रै जनता हुन, म कर तिरिदिन्छु’, खनाल भन्छन् ‘पाँच बर्षको कार्यकालमा कुनै न कुनै एउटा नमुना काम गरेर जनतालाई राहत दिने मेरो योजना छ ।’ उनले गाउँपालिकाको साथ पाए आगामी आर्थिक वर्षमा बिद्युत महशुल निःशुल्क बनाउने योजना रहेको सुनाए ।

गाउँ कार्यपालिकाको पहिलो बैठकले आगामि आर्थिक बर्षका लागि नीति तथा कार्यक्रम र बजेट तयार गर्न सुझाव संकलनका लागि प्रविधिको प्रयोग गर्ने निर्णय गरेको छ । ‘अनलाईन प्रविधिमार्फत् वडातह र विज्ञहरुसँग सल्लाह मागेर नीति तथा कार्यक्रम र बजेट तर्जुम ागर्ने निर्णय भएको छ’ प्रमुख प्रशासकीय अधिकृत जीतबहादुर रानाले भने ‘अध्यक्षले पदबहाली गर्दाको समयमा गरेका निर्णय आगामी नीति तथा कार्यक्रम र बजेटमार्फत् कार्यान्वयनमा आउने छन् ।’

पदबहालीको समयमा अध्यक्ष कृष्ण प्रसाद शर्माले बाबु आमा गुमाएका १८ बर्ष मुनिका बालबालिकालाई माध्यमिक तहसम्म निःशुल्क शिक्षा, वर्षायाममा खानेपानीका मुहानमा सरसफाई र उपयुक्त शुद्धिकरणको व्यवस्था, हरेक बर्थिङ सेन्टरमा गर्भवती तथा सुत्केरीका कुरुवाहरुका लागि आमा घर निर्माण, गाउँपालिकाको बिकासका लागि गाउँपालिका विकास फोरम गठन र एसईईमा उत्कृष्ट बिद्यार्थीले प्राविधिक विषय पढ्न चाहेमा छात्रावृत्तिको व्यवस्था गर्ने घोषणा गरेका थिए ।

कहालिलाग्दो कोभिड–१९ महामारीलाई सम्झिएको छ । गाउँपालिकामा महामारी नियन्त्रणका लागि खट्ने स्वास्थ्यकर्मी लगायत सरोकार वालालाई बैठकले धन्यवाद ज्ञापन गरेको छ । बैठकले बजेट तर्जुमा कार्यतालिका, बिभिन्न उपसमिति गठन लगायतका निर्णय गरेको अध्यक्ष कृष्ण प्रसाद शर्माले बताए । गाउँपालिकाको प्रबक्तामा कार्यपालिका सदस्य तुफान पुन चयन भएका छन् ।

हरेक वर्ष वर्षायाममा विपद्को सामाना गरिरहेको गाउँपालिकाले बिपत् पछिको राहत र उद्धारका लागि सबै सामग्री र जनशक्ति तयारी अबस्थामा राख्ने निर्णय गरेको छ । चालु आर्थिक बर्षमा छुटेका समपुरक लगायतका योजनाहरु केन्द्र र प्रदेश सरकारसँग माग गर्ने निर्णयसमेत गरेको शर्माले बताए ।