पोखरा / पत्रकार दीपेन्द्र श्रेष्ठलाई कर्म–कर्ण आदिवासी जनजाती पत्रकारिता पुरस्कार–२०८० प्रदान गरिएको छ ।
तमु धिं नेपालकी संस्थापक अध्यक्ष कर्म तमुले प्रदान गर्दै आएको पुरस्कार शुक्रवार नेपाल पत्रकार महासंघ कास्कीका निवर्तमान अध्यक्ष श्रेष्ठलाई प्रदान गरिएको हो ।
श्रेष्ठलाई नगद १० हजार रुपैयाँ, फेटा, भाङ्ग्रा तथा सम्मानपत्रले सम्मान गरिएको हो । पत्रकार हुमबहादुर गुरुङको संयोजकत्वमा एम.बि.आस्था मगर, शान्ति गुरूङ, उदय अमात्य र दिल प्रसाद गुरुङको छनौट समितिले श्रेष्ठलाई सिफारिस गरेको थियो ।
तमु धिं नेपालकी संस्थापक अध्यक्ष कर्म तमुले स्थापना गरेको सो पुरस्कार आदिवासी जनजाती पत्रकार संघ (फोनिज) कास्कीले सञ्चालन गर्दै आइरहेको छ ।
यसअघि, सो पुरस्कारबाट रीता गुरुङ, हर्क आले, शान्ति गुरुङ, तिलक पुन, राजबहादुर गुरुङ, मानबहादुर घर्तिमगर (एमबी आस्था), हुमबहादुर गुरुङ, उदयबहादुर अमात्य र रुद्रबहादुर श्रीस पुरस्कृत भइसकेका छन् ।
