दमौली / जिल्लाको आँबुखैरेनी गाउँपालिका र व्यास नगरपालिकाबाट बिहीबार लागुऔषधसहित प्रहरीले दुई जनालाई पक्राउ गरेको छ ।
मुग्लिङबाट आँबुखैरेनीतर्फ आउँदै गरेको ना ६ ख २५४९ नम्बरको बस प्रहरीले जाँच गर्दा बागलुङ नगरपालिका-३ का २१ वर्षीय अनिश विक पक्राउ परेका हुन् । प्रहरीले अनिशको साथबाट डाइजेपाम २०, नुफिन २० र फेनरागम २० थान बरामद गरेको छ ।
अनिशविरुद्ध बिहीबार नै अदालतबाट १० दिनको म्याद थप गरिएको छ ।
यसैगरी, व्यास नगरपालिका-४ भोर्लेटारचोकबाट व्यास-१० बोक्सीगैरा बस्ने १९ वर्षीय चन्द्रबहादुर कामी गाँजासहित पक्राउ परेका छन् ।
कामीले पछाडि बोकेको झोलाभित्र लुकाइछिपाई राखेको अवस्थामा १ किलो ९ सय ग्राम लागुऔषध गाँजा फेला परेको प्रहरीले जनाएको छ । कामीविरुद्ध पनि तनहुँ जिल्ला अदालतबाट ७ दिनको म्याद थप गरी अनुसन्धान भइरहेको छ ।
