दमौली / आफ्नै छोरीलाई विष खुवाएर मारेको अभियोगमा थुनामा रहेकी सुष्मा विकलाई तनहुँ जिल्ला अदालतले तीन वर्ष कैदको फैसला गरेको छ ।
छोरीलाई विष खुवाएर आफूले समेत सेवन गरेकी पोखरा २४ कास्कीकोटकी २९ वर्षीया सुष्मा विकलाई अदालतले तीन वर्ष कैद र ३० हजार रुपैयाँ जरिवाना सजायको फैसला गरेको हो ।
पुर्पक्षका लागि तनहुँ जिल्ला कारागारमा थुनामा रहेकी सुष्मामाथिको मुद्दामा जिल्ला न्यायाधीश हरिश्चन्द्र ढुङ्गानाको इजलासले कैदसहित जरिवाना सजायको फैसला बुधबार सुनाएको हो ।
तनहुँको आँबुखैरेनी स्थित एक लजमा २०७७ को माघ १९ गते विष सेवन गरेको अवस्थामा आमाछोरी फेला परेका थिए ।
उनीहरुलाई होटल सञ्चालकले उपचारका लागि तत्कालै अस्पताल पुराएपनि छोरी कुसुम विकको सोही दिन मृत्यु भएको थियो । उपचारपश्चात् आमा सुष्मा भने निको भएकी थिइन ।
घटना हुँदा वैदेशिक रोजगारीको क्रममा मलेसियामा रहेका सुष्माका श्रीमान मनोज विकले उनीविरुद्ध किटानी जाहेरी दिएका थिए ।
प्रहरीले सुष्मालाई २०७८ साउन ३० गते पक्राउ गरेको थियो । उनी विरुद्ध २०७८ भदौ १६ गते जिल्ला अदालतमा कर्तव्य ज्यानसम्बन्धी मुद्दा दर्ता भएको थियो ।
