बागलुङ, २१ भदौ– जिल्लाबाट प्रतिनिधित्व गर्ने गण्डकी प्रदेशका सांसद, बिभिन्न नगर तथा गाउँपालिकाका जनप्रतिनिधिको बैठकले कृषि ज्ञान केन्द्रलाई अर्को व्यवस्था नभएसम्म जिल्ला समन्वयमा सार्न आग्रह गर्ने निर्णय गरेका छन् ।
जिल्ला स्तरीय समीक्षाको बेला उपस्थित भएका उनीहरुको बैठकले बागलुङ नगरपालिकाले आबस्यक भवन निर्माण नगरुन्जेल ज्ञान केन्द्र स्थानान्तरण गर्ने र पछि पुनः व्यवस्थापन गर्न पहल गर्न निर्णय गरेको बताए । उक्त निर्णय अनुसार प्रदेश सरकार र जिल्ला समन्वय समितिलाई उनीहरुले आग्रह गर्ने बताए ।
जिल्ला समन्वय समितिको भवनमा केही कोठा खाली रहेकोले कृषि ज्ञान केन्द्र सारेर नगरपालिकाले हालको स्थानमा पक्की भवन निर्माणको काम थाल्न चाहेकोले त्यसका लागि पनि सरकारको ध्यानाकर्षण गर्ने निर्णय भएको हो । ‘सबै सांसदले साझा कुरा लिएर जाँदा सरकारले पनि मान्नुपर्छ’ माओवादी सचेतक कुशुम बुढा मगरले भनिन्, ‘जनगुनासोलाई सम्बोधन गर्दै जान सकेमा राम्रा काममा सबैको साथ पाइन्छ ।’
नगरपालिका हाल ५ स्थानमा छरिएर बसेको छ । नगरपालिका बसेको तत्कालिन कृषि विकास कार्यालयको जग्गा र भवन हो । ज्ञान केन्द्रलाई अर्को व्यवस्था नभइन्जेल समन्वयमा राख्न सकेमा नगरपालिकाले भवन निर्माण गरी दुवै कार्यालय संचालन गर्न सक्ने व्यवस्थापन गर्ने नगरप्रमुख बसन्तकुमार श्रेष्ठले बताए । बैठकले जिल्लाका दशवटै पालिकाहरुको उत्पादन तथा पहिचानका बस्तुहरु राख्ने कोसेली घर सदरमुकाममा बनाउने निर्णय गरेको छ । त्यसको अगुवाइ नगरपालिकाले गर्ने छ ।
बैठकले निर्माणाधिन राष्ट्रिय गौरवका आयोजना समयमा सक्न बागलुङका जनप्रतिनिधिले सरकारको ध्यानाकर्षण गरेका छन् । उनीहरुले नयाँ दिर्घकालिन योजनाको प्रस्ताव बनाउन गर्न बागलुङ नगरपालिकालाई जिम्मा दिने निर्णय गरेका छन् । कार्यक्रममा सहभागिहरुले सदरमुकाममा अबस्थित भएकोले कतिपय महत्वपूर्ण विकासको काममा बागलुङ नगरले अगुवाइ गर्नुपर्ने धारणा राखेका छन् । ‘पार्टीको रुपमा हामी फरक फरक भएपनि जिल्ला र नगरको हितमा ल्याउने योजनामा एक ठाउँमा छौं’ एमाले नेता तथा प्रदेशसभाका सदस्य कृष्ण पाठकले भने, ‘सबै जनप्रतिनिधि मिल्दा जिल्लाको विकासमा योगदान पुग्छ ।’
जिल्लाको दिगो विकास र समृद्धिका लागि योजना आयोगसहित सबै सांसद, मन्त्री र जनप्रतिनिधि तथा सरोकारवाला र बिज्ञ टोलीको बृहत भेला गरी दिगो विकासका योजना निर्माण गर्ने समेत बैठकले निर्णय गरेको हो । उक्त बैठकमा कांग्रेस केन्द्रीय सदस्य तथा सांसद चम्पा खड्का, कांग्रेस सभापति तथा सांसद जितबहादुर शेचरन, डिल्लीराम सुवेदी, द्रोण कुँवर लगायतले सुझाव दिएका थिए ।
उक्त अबसरमा तमानखोलाका अध्यक्ष जोकलाल बुढा, बडिगाडका अध्यक्ष गण्डकी थापा, काठेखोलाका अध्यक्ष राजु थापा र निसीखोला गाउँपालिकाका अध्यक्ष सूर्यबहादुर घर्ती समेतले आबस्यक सुझाव पेश गरेका थिए ।

नगरप्रमुख श्रेष्ठले मध्यपहाडी लोकमार्गको सडक बिस्तार भैरहेपनि मालढुंगादेखि बागलुङ बजार खण्डलाई बेवास्ता गरिएकोले प्रदेशसभा र प्रदेश सरकारमा यो बिषयले प्रवेश पाउनुपर्ने सुझाएका थिए । त्यस्तै मापदण्ड बिपरितका संरचना हटाउने अभियान चलेको जानकारी गराए । बिद्यालय शिक्षाको बिषयमा एकीकृत कानून नहुँदा पालिका पिच्छे फरक फरक कार्यविधि बनेकोमा शिक्षकको सरुवा, बढुवा र लागत राख्ने काममा समस्या भएको पालिकाका प्रमुखहरुको चिन्ता थियो ।