बागलुङ/ सवारी दुर्घटना कम गर्ने सन्देश दिन बागलुङ जेसीजले संचालन गरेको जेसीज सप्ताह २०२३ को दोस्रो दिन ‘स्लो बाइक रेस’ प्रतियोगिता गरिएको छ । जेसीजले स्वर्गिय सत्यदेवि स्मृति ‘स्लो बाइक रेस’ प्रतियोगिता गरेको हो ।
जेसीज सप्ताहको दोस्रो दिन स्वर्गिय सत्यदेवी स्लो वाइक रेस प्रतियोगिता गरिएको सप्ताहका मुल संयोजक गणेश महतोले बताए । सवारी साधन तीव्र गतिमा चलाउँदा हुन सक्ने सम्भावित दुर्घटनालाई कम गर्ने सन्देशस्वरुप ट्राफिक सचेतनाका लागि पुरुषतर्फ मोटरसाइकल र महिलातर्फ स्कुटीमा स्लो रेस प्रतियोगिता गरिएको थियो ।
महिला र पुरुष गरी ६७ जनाको सहभागिता रहेको प्रतियोगिताबाट पुरुषतर्फ सागर जिसी उत्कृष्ट भए भने महिलातर्फ ज्ञानु केसी उत्कृष्ट भइन् । जिसीले १ मिनेट १७ सेकेन्डमा र केसीले २५ सेकेन्डमा २० मिटरको दूरी पार गरे । प्रतियोगिताबाट उत्कृष्ट हुनेलाई सप्ताहको अन्तिम दिन पुरस्कार प्रदान गरिने छ ।
कार्यक्रमको उद्घाटन गर्दै जिल्ला ट्राफिक प्रहरी कार्यालयका सूचना अधिकारी प्रहरी सहायक निरीक्षक नारायणकुमार श्रेष्ठले ट्राफिक सचेतना नहुँदा धेरैको अकालमै ज्यान जाने हुँदा यस्ता खालका कार्यक्रमले सचेतनामा महत्वपूर्ण सहयोग पुग्ने बताए ।
उनले ‘छिटो गए भन्न सकिँदैन ढिला गए अवस्थ पुगिन्छ’ भन्ने उक्तिलाई आत्मसाथ गरेमा दुर्घटना कम हुने बताए । कार्यक्रममा स्वर्गीय सत्यदेवी स्मृति कोषका संरक्षक शैलेन्द्रकुमार श्रेष्ठले पनि मंतव्य व्यक्त गरे ।
कार्यक्रम बागलुङ जेसीज वर्ष २०२३ का शाखा अध्यक्ष सौरभ श्रेष्ठको अध्यक्षता, सप्ताहका मूल संयोजक एवं कार्यकारीणी उपाध्यक्ष गणेश महतोको स्वागत र कार्यक्रम संयोजक प्रेमप्रसाद ढकालको संचालनमा सम्पन्न भएको थियो । सप्ताहको तेस्रो दिन सोमबार विद्यालयस्तरीय नृत्य प्रतियोगिता आयोजना गरिएको छ ।
