बागलुङ/ बागलुङ नगरपालिकाले पहिलो पटक केही फलफुलको मुल्य तोकेको छ । बागलुङ नगरपालिका उपभोक्ता हित संरक्षण समितिको मंगलबार बसेको बैठकले व्यवसायी तथा सरोकारवाला सँगको मरामर्शपछि फलफुलको खरिद तथा बिक्री मुल्य तोकेको हो ।
बागलुङ बजारमा फलफुलको मुल्यमा मनपरी हुने गरेको उपभोक्ताको गुनासो छ । नगरपालिकाले जिल्ला प्रशासन, खाद्य प्रबिधि तथा गुण नियन्त्रण कार्यालय, उपभोक्ता मञ्च र फलफुल व्यवसायसँग सम्बन्धित संगठनहरुको परामर्शपछि फलफुलको मुल्य तोकेको समितिका संयोजक नगर उपप्रमुख राजु खड्काले बताए ।
नगरपालिकाले भारतीय केराको मुल्य प्रतिदर्जन १ सय ५० रुपैयाँ तोकेको छ । यसअघि बागलुङ बजारमा एसि केराको नममा उक्त केरा प्रतिकिलो १ सय ८० रुपैयाँमा बिक्री हुँदै आएको थियो । नेपालको तराईमा पाईने केराको बिक्री मुल्य १ सय ४० रुपैयाँ तोकिएको छ । खरिद मुल्य बिल बिजक अनुसार हुने उल्लेख छ ।
त्यस्तै स्थानीय केरा सानो कोशाको प्रतिदर्जन १ सय २० रुपैयाँ र स्थानीय केरा ठुलो कोशाको प्रतिदर्जन १ सय ५० रुपैयाँ मुल्य तोकिएको छ । स्थानीय मुरे केराको भने प्रतिगोटा १५ रुपैयाँ खरिद र २० रुपैयाँ बिक्री मुल्य तोकिएको छ ।
मुस्ताङको स्याउ ठुलो रातो दानाको मुल्य प्रतिकिलो २५० र रातो सानो दानाको प्रतिकिलो २२० रुपैयाँ तोकिएको छ । गोल्डेन स्याउको प्रतिकिलो बिक्री मुल्य २ सय ४० रुपैयाँ तोकिएको खड्काले जानकारी दिए ।
चिनबाट नेपाली बजारमा आउने फुजी स्याउ ठुलो दानाको ३ सय ८० र सानो दानाको ३ सय ५० रुपैयाँ मुल्य तोकिएको उनले जानकारी दिए । स्याउ चाईनिज डेलीको भने प्रतिकिलो २५० रपैयाँ मुल्य तोकिएको छ ।
समितिले अन्य फलफुलको भने मुल्य तोकिएको छैन् । चाडवार्ड नजिकिएका बेला बजारमा कालोबजारी हुनसक्ने भएकाले तत्कालका लागि स्याउ र केराको मुल्य तोकेर प्रयास थालेको प्रशासकीय अधिकृत युक्त प्रसाद सुवेदीले बताए । ‘तत्काल सबै फलफुलको मुल्य तोक्न सम्भव भएन्, सिजन अनुसारका फलफुलको मुल्य तोक्दै जाने तयारी छ’ सुवेदीले भने ‘स्याउ र केराको मुल्य कार्यान्वयनमा आउँदा बित्तिकै उपभोक्ता, बिक्रेता र उत्पादक सबैलाई सहज हुन्छ ।’
