बागलुङ/जिल्लाको जैमिनी नगरपालिका–१ को वडा कार्यालयले पाँच सामुदायिक विद्यालयलाई ल्यापटप उपलब्ध गराएको छ । विद्यालयलाई प्रविधिमैत्री बनाउने उद्देश्यले विद्यालयबाट माग भइआएका निवेदनका आधारमा वडाले ल्यापटप वितरण गरेको हो ।
प्राथमिक तह सञ्चालनमा रहेका विद्यालयलाई प्रबिधिमैत्री शिक्षण सिकाईका लागि ल्यापटप उपलव्ध गराईएको वडाध्यक्ष बिष्णु आचार्यले बताए । विद्यालयमा मात्रै नभई प्रयोगात्मक काममा विद्यालय बाहिर जाँदा पनि ल्यापटप लैजान सजिलो हुने भएकाले विद्यालयलको मागबमोजिम ल्यापटप हस्तान्तरण गरिएको उनले बताए ।
वडाध्यक्ष आचार्यका अनुसार कुश्मी प्रावि, सिद्धिगाणेश प्रावि, जनचेतना प्रावि, सरस्वती प्रावि र जैमिनी प्राथमिक बिद्यालयलाई ल्यापटप प्रदान गरिएको छ ।
वडा कार्यालयमा आयोजित एक समारोहमा नगर शिक्षा अधिकारी खेम आचार्यले विद्यालयका प्रधानाध्यापकलाई ल्यापटप उपलव्ध गराएका थिए । वडामै रहेका शान्ति मावि र पल्लोपाखा सामुदायिक माविलाई भने अन्य कार्यक्रममा सहभागि गराईने उनले बताए ।
चालु आर्थिक बर्षमा प्राथमिक विद्यालयमा ल्यापटप वितरणका लागि वडा कार्यालयले ३ लाख ५० हजार रुपैयाँ बिनियोजन गरेको थियो । उनका अनुसार प्रतिल्यापटप ७० हजार रुपैयाँका दरले खरिद गरिएको हो ।
‘कम्तिमा प्राविधिक बिषय प्रोजेक्टरको माध्यामबाट पढाउन सकियोस्, विद्यार्थीलाई शिक्षण सिकाईमा प्रविधिको प्रयोग गर्न सकियोस् भन्ने हो’ वडाध्यक्ष आचार्यले भने ‘यो सुरुवात हो, यसको नतिजाका आधारमा बाँकी कार्यक्रम बनाउँछौं ।’