बागलुङ / बडादशैंका अवसरमा बागलुङका युवा र बालबालिका चङ्गा चेटमा रमाएका छन् । सदरमुकाम बागलुङस्थित धवलागिरी क्याम्पस चौरमा आयोजित चङ्गा चेट प्रतियोगिताले दशैंको माहोल बढाएको उनीहरुको अनुभव छ ।
दशैंको अवसर पारेर रोट्र्याक्ट क्लब अफ बागलुङले चङ्गा चेट प्रतियोगिता गरायो । चङ्गा चेट प्रतियोगितामा राकेश शर्मा विजयी भएका छन् । उनले रु. पाँच हजार पाँच सय ५५ पुरस्कार प्राप्त गरे । क्लबका अध्यक्ष सौरव केसीका अनुसार दोस्रो स्थान बबिन शाक्यले हासिल गरे।
प्रतियोगितामा १७ जनाले भाग लिएका थिए । प्रतियोगितामा सहभागी सबैलाई क्लबले उपहार प्रदान गरेको छ । प्रतियोगीबाहेकले पनि चङ्गा उडाएर मनोरञ्जन लिएका थिए । क्लबले गत वर्षदेखि चङ्गा चेट प्रतियोगिता गर्न सुरु गरेको हो ।
‘दशैंमा चङ्गा उडाउने परम्परालाई जोगाइराख्न र प्रतियोगितामार्फत युवा तथा बालबालिकालाई मनोरञ्जन प्रदान गर्ने उद्देश्यले चङ्गा चेट कार्यक्रम राखिएको हो’, अध्यक्ष केसीले बताए ।
चाडबाडका अवसरमा खुसियाली साट्ने माध्यमका रुपमा पनि चङ्गा चेट गर्ने गरिएको छ । पछिल्लो समय चङ्गा उडाउने चलन कम हुँदै गएको छ ।
चङ्गालाई खुसी र हर्षोल्लासको प्रतिकका रुपमा लिइन्छ । दशैं, तिहारका बेला चङ्गाको व्यापार पनि राम्रै हुने गरेको व्यवसायी यहाँका व्यवसायीहरु बताउँछन् ।
