पोखरा/ नेपाली कांग्रेसका महामन्त्री गगनकुमार थापाले स्थिर सरकार संचालनमा अहिलेको निर्वाचन प्रणाली बाधम भएकाले अव निर्वाचनमा धेरै मत पाउने राजनीतिक दलले ५ वर्षसम्म सरकार चलाउन पाउने गरी संविधान संसोधन गर्नुपर्ने बताएका छन् । अहिलेको निर्वाचन प्रणाली कुनै पनि दलले ५ वर्ष सरकार चलाउन नपाउने गरी बनाइएको भन्दै उनले लोकप्रिय मत पाउने दलले ५ वर्षसम्म सरकार चलाउन पाउनुपर्ने जिकीर गरेका हुन ।
शनिवार पोखरामा आयोजित गण्डकी प्रदेशस्तरीय अभिमुखीकरण कार्यक्रममा थापाले अहिलेको संवैधानिक व्यवस्था अनुसार बहुमत नपाउँदा अर्को दलसँग मिलेर सरकार बनाउनुपर्ने बाध्यता हुने गरेको भन्दै उनले नेपालमा गठबन्धनको विकृत अभ्यास भएको बताए । ‘‘गठबन्धनको यति तीतो अनुभव हामीसँग रह्यो, गठबन्धनको यति विकृत अभ्यास हामीहरुका सन्दर्भमा भयो’, उनले भने, ‘चुनाव अगाडिका लागि मात्र होइन, चुनावपछि पनि हेर्नुस् त यसबीचमा हामीले कतिवटा सरकार बदल्यौं । सरकारमा बसेको प्रधानमन्त्रीले हरेक दश दिनमा यो सरकार बदलिन्न भन्नुपर्ने अवस्था छ । भाषण यो सरकार बदलिन्न भन्नेबाट सुरु हुन्छ ।’ अरु कतिपय देशमा गठबन्धन सरकार लामो समयसम्म चलेको तर नेपालको सन्दर्भमा गठबन्धन सरकार ठिक नभएको उनको भनाई थियो । गठबन्धनको सरकार चलाउने एउटा संस्कार, संस्कृति हुने उनले बताए ।
उनले अहिलेको समावेशितालाई कायम राख्दै लोकप्रिय मत पाउने दलले पाँच वर्ष सरकार चलाउन पाउनुपर्ने व्यवस्था संविधानमा गर्नुपर्ने जनाएका हुन । प्रदेश सरकारको मन्त्रिपरिषद्को आकार घटाउनुपर्ने पनि उनले बताए । प्रदेश सरकारमा चार–पाँच जना मन्त्री रहने भनेर संविधानमै लेख्नुपर्ने उनले बताए ।
