पोखरा/ पोखरा–२२ पुम्दीकोटमा कैशालधाम निर्माण गर्ने उद्धेश्यले श्रीमद्भागवत ज्ञान महायज्ञ एवम् महाशिवरात्री महिमा हुने भएको छ । पुम्दिकोट कोट विकास समितिको आयोजनामा आगामी फागुन ७ गतेदेखि १५ गतेसम्म उक्त महायज्ञ आयोजना हुने भएको समितिका अध्यक्ष एवं मुल आयोजक समितिका संयोजक चन्द्रकान्त बरालले बताए ।

बरालले पछिल्लो समयमा चर्चामा रहेको पुम्दीकोट क्षेत्रको अधुरा भौतिक पूर्वाधारसहित एकरात पर्यटकको बसाई अवधि लम्बाउने उद्धेश्यले पूर्वाधार निर्माण बनाउन हुन लागेकोे महायज्ञलाई सफल पार्न सबैको साथ र सहयोग आवश्यक भएको जनाए । पुम्दीकोट कोट विकास समितिले यसअघि २०७३ र २०७९ मा गरेका शिव महापुराण ज्ञान महायज्ञ लगायत हालसम्म दानदाताहरुले गरेको सहयोगलाई संकलन गर्दै आएको उनले बताए । अझै पनि कैलाशधाम निर्माण गर्ने अभियान निरन्तर जारी रहेको उल्लेख गर्दै उनले पर्यटनको राजधानी पोखरा आउने पर्यटकको बसाइँ कम्तिमा पनि १ दिन लम्व्याउने उद्देश्य अनुरुप साँझको समयमा विशाल महादेवको मूर्तिलाई पर्दा बनाई लेजर लाईट मार्फत् शिवलीला प्रदर्शन गर्ने, कैलास पर्वतदेखि सुमेरु पर्वतसम्म पहुँचको लागि शिसाको पुल निर्माण गर्ने, हरियाली उद्यान, अन्तर्राष्ट्रिय ध्यान केन्द्रमा इको साउण्ड नियन्त्रण गर्ने जस्ता कार्य गर्ने रणनैतिक लक्ष्य राखि श्रीमद्भागवत ज्ञान महायज्ञ एवम् महाशिवरात्री महिमा–२०८१ को आयोजना गर्न लागिएको अध्यक्ष बरालले जनाए ।

प्रचार प्रसार गर्दा सामाजिक संजाललाई अधिकरुपमा प्रयोग गरी कास्की सहित गण्डकी प्रदेशका जिल्लासम्म उक्त महायज्ञमा सहयोग गर्ने दाताको खोजि गर्ने तथा महायज्ञमा सहभागिताको लागि निमन्त्रणा गर्न सबै एक भई लाग्ने सहसंयोजक मात्रिका बरालले बताए । पुम्दी भुम्दी क्षेत्रका स्थानिय सम्पुर्णमा उक्त महायज्ञ भव्य रुपमा सफल पार्न र आवश्यक सहयोग गर्न समितिले आव्हान समेत गरेको छ । प्रचार समितिले घरदैलोदेखि तुल व्यानर, प्रर्चा पम्प्लेट, माइकिङ सहित प्रचार अभियानमा जुट्ने भएको छ ।

गण्डकी प्रदेशका सांसद प्रकाश बरालले महायज्ञ सफल पार्न आफ्नो क्षेत्रबाट अहोरात्र खट्ने प्रतिवद्धता जनाएका छन् । वडा अध्यक्ष हिमलाल बराल, स्थानीय लक्ष्मीदेवी पौडेल लगायतले आफ्नो गाउँमा बृहत योजना सहित आयोजना हुने महायज्ञलाई सफल पार्न आवश्यक सहयोग गर्ने बताए । प्रचार प्रसारको दोश्रो बैठक यही माघ २५ गते बस्ने भएको समितिले जनाएको छ । १ सय ७ सदस्य प्रचार प्रसार समिति गठन भएको समितिका व्यबस्थापक रुद्रनाथ पौडेलले बताए । महायज्ञमा प्रमुख बाचक भागवत मञ्जरी (माता) राधिका दासी रहनु हुने भएको छ ।