पोखरा/ कास्की जिल्लालाई पूर्ण खोप सुनिश्चितता दीगोपना जिल्ला घोषणा गरिएको छ। सोमबार जिल्ला खोप समन्वय समिति कास्कीको आयोजनामा गण्डकी प्रदेशका स्वास्थ्यमन्त्री कृष्णप्रसाद पाठकले उक्त घोषणा गरे । मन्त्री पाठकले नागरिकलाई चेतनाको वृद्धि गराई रोगबाट सुरक्षित राख्न प्रदेश सरकारले प्राथमिकता दिएको बताए ।
सर्ने र नसर्ने दुवै रोगबाट नागरिक सुरक्षित भएमात्र समृद्धिको यात्रा सहज हुने भन्दै, प्रदेश सरकार मातहतका अस्पतालहरू स्तरोन्नति गर्ने कार्यमा लागेको जानकारी उनले दिए । उनले अस्पतालहरूको क्षमता वृद्धिसँगै सेवा(सुविधा तथा नागरिक स्वास्थ्य कार्यक्रमहरूलाई अघि बढाइएको उल्लेख गर्दै मन्त्री पाठकले स्वास्थ्य जनशक्ति प्रदेशमै उत्पादन गर्न र प्रदेशमा विशिष्टीकृत अस्पताल सञ्चालनको तयारी भइरहेको जानकारी पनि दिए । ‘प्रदेशलाई आवश्यक मानव स्रोतसहित अन्य सेवाको व्यवस्थित सञ्चालनमा सरकार केन्द्रीत रहेको छ’, उनले भने, ‘मानसिक रोग भयावह बन्दै गएकाले त्यसका लागि विशेष अस्पताल आवश्यक देखिएको र त्यसतर्फ उल्लेख्य सुधारका काम अघि बढाइएको छ ।’ स्वास्थ्य र आरोग्यताको क्षेत्रमा काम गर्ने महिला स्वास्थ्य स्वयंसेविकाहरूका समस्या सम्बोधन गर्न मन्त्रालयबाट पहलकदमी लिइएको उनले बताए ।
जिल्ला खोप समन्वय समिति कास्कीका संयोजक तथा जिल्ला समन्वय समिति कास्कीका प्रमुख लिलाधर पौडेलले शुद्ध सेवा भावबाट उत्प्रेरित स्वयंसेविका, सरकारी संयन्त्र र आम कास्कीबासीको सहयोगबाट पूर्ण खोप सुनिश्चितता सम्भव भएको भन्दै आरोग्य र स्वस्थ कास्कीबासी निर्माणको आधार तयार हुँदै गएको बताए । कार्यक्रममा कास्कीका प्रमुख जिल्ला अधिकारी रुद्रादेवी शर्मा, नेपाली कांग्रेस कास्कीका सहसचिव नविन सिग्देल, एमाले उपसचिव सन्तु सुवेदी, रास्वपा सहसचिव एकराज सापकोटा प्रादेशिक स्वास्थ्य निर्देशनालय गण्डकीका महानिर्देशक खिमबहादुर खड्का, पत्रकार महासंघ कास्कीका अध्यक्ष माधव बराल महिला स्वास्थ्य स्वयंसेविका सञ्जाल कास्कीकी अध्यक्ष भीमा पौडेल,ले शुभकामना मन्तव्य व्यक्त गरेका थिए । उक्त अवसरमा ६० वर्ष उमेर पूरा गरेका महिला स्वास्थ्य स्वयंसेविकाहरूलाई सम्मानसहित विदाइ पनि गरिएको थियो।
कार्यक्रम जिल्ला खोप समन्वय समिति कास्कीका संयोजक तथा जिल्ला समन्वय समिति कास्कीका प्रमुख लिलाधर पौडेलको अध्यक्षतामा सम्पन्न भएको थियो। कार्यक्रममा स्वागत जिल्ला समन्वय अधिकारी नवराज बराल र सञ्चालन प्रादेशिक जनस्वास्थ्य कार्यालय कास्कीका प्रमुख रामबहादुर नेपालीले गरेका थिए ।
