पोखरा/शुक्रबार पोखरामा नेपथ्य घन्कियो । नेपाल प्रिमियर लिगको फ्रेन्चाइज टिम पोखरा एभेन्जर्सले पोखरामा विश्वचर्चित नेपाली ब्यान्ड नेपथ्यको कन्सर्टको आयोजना ग¥यो ।

पोखरा रंगशालास्थित फुटबल मैदानमा १० हजार दर्शकलाई समेटेर कन्सर्टको आयोजना गरिएको थियो । ६ बजे सुरु हुने कन्सर्ट हेर्नका लागि दिउँसो ३ बजेबाट दर्शकहरु पोखरा रंगशाला आउन सुरु गरिसकेका थिए । ४ बजेपछि पृथ्वी चोकबाट जाम सुरु हुन थालिसकेको थियो । नेपथ्यको कन्सर्ट सुरु हुँदा थामि नसक्नु भीड भइसकेको थियो । कन्सर्टको अघिल्लो दिन राती नै टिकट समेत सोल्डआउट भएको थियो तथापि टिकट रंगशाला काट्न पाइन्छ की भन्ने आशाले आउने दर्शक पनि थिए ।

कन्सर्ट सुरु भएपछि दर्शकहरु नाचे, झुमे र नेपथ्यका भोकलिष्ट पोखरेली अमृत गुरुङको तालमा ताल मिलाउँदै गीत गाउन थाले । बीचबीचमा नेपथ्यले दर्शकहरुलाई आग्रहपनि गरिरहेका थिए । अमृत गुरुङले आफ्ना दर्शकहरुलाई कसैले पनि आर्थिक अभावकै कारण विद्यालय जानबाट बञ्चित हुन नपरोस भन्दै सहयोग र अक्षयकोष स्थापना गरिदिन आग्रह गरे । आफुले जीवनभर सिकेको कुरा नै शिक्षा भन्दा ठूलो संसारमा केही नभएको र यसका लागि सबैले सहयोग गर्न अत्यावश्यक रहेको सुनाए ।

‘जिन्दगी भनेको के नै रहेछ र ? शिक्षाको जति उज्यालो संसारमा अरु केहि पनि छैन् । त्यहि भएर आफ्नो मनमा लागेको कुरा गर्नुपर्दो रहेछ र मान्छेले धर्र्मकर्म गरेर धेरै पुण्य कमाउँछन् तर, म यहाँहरुलाई यो मञ्चबाट अनुरोध गर्दछु’ उनले भने, ‘आफ्नो टोल छिमेकमा नानीबाबुहरु विद्यालय जानबाट बञ्चित भएका छन् भने तिनलाई सहयोग गरेर अक्षयकोष स्थापना गरेर विद्यालय पठाउने र पुण्य कमाउने गरौं हइइइ….।’

सोही क्रममा उनले खेलकुदको विकासका लागि खेलाडी र खेल प्रेमी नै लाग्नुपर्ने भन्दै पोखरा रंगशालालाई अन्तर्राष्ट्रिय स्तरको बनाउनुपर्नेमा समेत जोड दिए । हिजो आफूहरु युवास्थामा त्यहाँ पुग्दा र आज पुग्दा पूर्वाधारमा ठूलो परिवर्तन देखेको गुरुङको भनाइ छ । रंगशाला बनाउने सपना देख्नेहरूलाई धन्यवाद दिदै यसको संरक्षणमा सबै लाग्नुपर्ने बताए ।

यस्तै भदौ २३ र २४ गतेको आन्दोलनलाई सम्झदै कन्सर्टमा आउने जेन जी पुस्ताका दर्शकलाई अब विध्वंस गर्न कोही आएमा प्रतिकार गर्न र विध्वंस नमच्याउने प्रण गर्न आग्रह गरे । नेपाललाई कसैले विखण्डित गर्न नसक्ने भन्दै आगामी फागुन २१ गते हुने निर्वाचनका लागि सबैले मतदाता परिचयपत्र बनाइ राम्रोलाई रोज्ने र नराम्रोलाई फाल्ने काममा लाग्न समेत अनुरोध गरे । उनले भ्रष्टाचार विरुद्ध सबैले आवाज उठाउनुपर्ने सुनाए ।

पोखरा एभेन्जर्सले आफ्नो प्रचार र क्रिकेट विकासका लागि भन्दै कन्सर्ट आयोजना गरेको हो । उक्त कन्सर्टमा विक्रि भएको प्रत्येक टिकटबाट तीन सय रुपैयाँ खेलकुदको विकासमा खर्च गरिनेछ । तीन सय मध्ये एक सय रुपैयाँ सार्वजानिक विद्यालयको खेलकुदमा खर्चिने छ । जसमा नेपालयले समेत थप गरेर कास्कीका सार्वजानिक विद्यालयहरुमा खेल सामग्री र आर्थिक अभाव भएकाहरुको पढाइमा खर्च गरिनेछ ।

टिकट भनेर छुट्टै नराखिएपछि आयोजकले विभिन्न क्याटेगोरी जर्सीलाई प्रवेश पासका रूपमा विक्री गरेको थियो । सुरुका १ हजार दर्शकलाई ९ सय ९९ मा राखिएको जर्सी त्यसपछि १ हजार ४ सय ९९ रुपैयाँमा दिइएको थियो ।