बागलुङ/कुनैबेला माओवादी अध्यक्ष पुष्पकमल दाहाललाई झापड हानेर चर्चामा रहेका पदमबहादुर कुँवर अहिले कांग्रेस उम्मेदवारको प्रचारमा लागेका छन् । बागलुङ क्षेत्र नं. २ मा प्रगतीशिल लोकतान्त्रिक पार्टी (प्रलोपा)का उम्मेदवार बनेर एक महिना घरदैलो गरेपछि बुधबार उनले कांग्रेस नेता टेकराज पौडेललाई सहयोग गर्न पुगेका हुन् ।
कुँवरले बुधबार नेपाली कांग्रेसका उम्मेदवार टेकराज पौडेललाई समर्थन गर्ने घोषणा गरे । बुधबारदेखि उनले आफ्नो उमेदवारी मिडप्याक गरेर कांग्रेसका पौडेललाई साथ दिने घोषणा गरेका हुन् । बुधबार पौडेलले प्रतिवद्धता पत्र सार्वजनिक गर्ने कार्यक्रममा बुर्तिवाङमा पुगेर उनले पौडेललाई नै समर्थन गरेको जानकारी गराएका हुन् ।
तत्कालिन माओवादीमा क्रियाशिल रहेका कुँवर नेकपा बनेपनि प्रलोपामा लागेका थिए । ‘म उम्मेदवार बन्दाभन्दा मिडप्याक गरेर लाग्दा पौडेललाई सहज हुन्छ’ उनले भने, ‘भोलीदेखिनै कांग्रेसमा लागेर मत माग्न जान्छु ।’ उनले आँखा चिन्ह लिएर निर्वाचनमा होमिएका थिए । उनले समानुपातिक मत समेत कांग्रेसमै माग्ने बताए ।
बुधबार पौडेलले भने जिल्लाको पश्चिम क्षेत्र ओगटेको क्षेत्र नं. २ लाई समृद्द बनाउने योजना सहितको प्रतिवद्दता पत्र पनि सार्वजनिक गरेका छन् ।
