काठमाडौं / पूर्वप्रधानमन्त्री एवं नेकपा (एमाले)का अध्यक्ष केपी शर्मा ओलीलाई काठमाडौंको महाराजगन्जस्थित त्रिवि शिक्षण अस्पतालको बेड नम्बर ५०१ मा राखिएको छ । ‘एनेक्स वान’ भवनको बेड नम्बर ५०१ मा राखिएको अस्पतालले जनाएको छ ।
ओली मिर्गौला प्रत्यारोपणका पुरानो बिरामी भएकाले र हिरासतको तनावले स्वास्थ्यमा थप जटिलता आउन सक्ने जोखिमलाई ध्यानमा राख्दै ‘आइसोलेसन वार्ड’मा राखिएको अस्पतालका प्रवक्ता डा। गोपाल सेढाईंले बताए ।
प्रवक्ता सेढाईंले भने, ‘उहाँलाई राखिएको बेड क्याबिन हो । मिर्गौला प्रत्यारोपण गरेकाले निगरानीमै राखिएको हो । मुटुको डाक्टरले जाँच गर्नुभयो । मुटुको धड्कन केही तलमाथि पाइएको छ । कार्डियोलोजिस्टले २४ घण्टा निगरानीमा राख्न सक्नुहुन्छ ।’
नवनियुक्त गृहमन्त्री सुदन गुरुङको निर्देशनमा ओलीसहित पूर्वगृहमन्त्री एवं नेपाली कांग्रेसका नेता रमेश लेखकलाई शनिबार (चैत १४) बिहान भक्तपुरस्थित उनीहरूका निवासबाट प्रहरीले नियन्त्रणमा लिएको छ । ओली–लेखक दुवैलाई म्याद थपका निम्ति आइतबार (चैत १५) अदालतमा पेस गर्ने प्रहरीको तयारी छ ।
एमालेका नेताहरूले भने पक्राउलाई राजनीतिक प्रतिशोध भन्दै विरोध सुरु गरिसकेका छन् । जनसंगठनले आज र पार्टीले भोली देशभर नै विरोध गर्ने जनाएको छ ।
